Azərbaycanda lüks avtomobil şirkəti kapitalını 16,5 milyon manat azaldıb

“Avtolüks Azərbaycan” MMC nizamnamə kapitalını 17 milyon manatdan 500 min manata endirir.

Valyuta.az xəbər verir ki, kapitalın azaldılması nəticəsində ümumi azalma 16,5 milyon manat təşkil edir.

Qeyd edək ki, şirkət bu ilin sentyabr ayında da nizamnamə kapitalını 37,4 milyon manatdan 17 milyon manata endirmişdi.

Xatırladaq ki, İtaliya, ABŞ və Birləşmiş Krallığın tanınmış avtomobil brendlərinin Azərbaycanda eksklüziv təmsilçisi olan “Avtolüks Azərbaycan” MMC 2012-ci ildə dövlət qeydiyyatına alınıb. Şirkətin qanuni təmsilçisi Azər Cəlilovdur.

“Avtolüks Azərbaycan” 2012-ci ildən etibarən Lamborghini, Ferrari və Aston Martin markalı avtomobillərin satışını həyata keçirir. Bundan əlavə, şirkət Abarth, Alfa Romeo, Chrysler, Dodge, Fiat, Fiat Professional, Jaguar Land Rover və Jeep kimi brendlərin də Azərbaycandakı rəsmi təmsilçisidir.

Mayya Hüseynova