Azərbaycan və Hindistan şirkətlərinin mübarizəsi: İtaliyadakı milyard dollarlıq tenderin qalibi kim olacaq?

"Baku Steel Company" İtaliyanın "Acciaierie d’Italia" polad zavodunu almaq üçün təqdim edəcəyi təklifini təxminən 1 milyard avroya (1,05 milyard dollar) qaldırmağı planlaşdırır.

Valyuta.Az xəbər verir ki, bu barədə "Il Messaggero" qəzeti məlumat yayıb.  

Bununla da şirkət zavodun alınması üçün keçirilən tenderdə əsas namizəd hesab edilir. 

Məlumata görə, rəsmi təklif yaxın günlərdə təqdim ediləcək və İtaliya hökuməti mart ayına qədər danışıqları yekunlaşdırmağa ümid edir. Qəzet məlumatın mənbəyi barədə açıqlama verməyib. "Il Messaggero"nun xəbərinə görə, zavod üçün digər əsas təklifi Hindistanın "Jindal Steel" şirkətinə məxsus "Vulcan Green Steel" verib. Lakin "Baku Steel"in təklifi daha yüksəkdir.

Qeyd edək ki, əsası 1965-ci ildə qoyulan "Acciaierie d'Italia" zavodu İtaliyanın ən böyük polad istehsalçısıdır və əsasən Taranto şəhərində yerləşən zavodda fəaliyyət göstərir. Bu zavod, Avropanın ən böyük polad istehsal müəssisələrindən biri hesab olunur. Şirkət, avtomobil sənayesi, tikinti, enerji və qida emalı kimi müxtəlif sahələr üçün polad məhsulları istehsal edir. 

Zavod artan enerji xərcləri və zəif tələbat səbəbindən istehsalı davam etdirməkdə çətinlik çəkib və bu səbəbdən də dövlətin idarəçiliyinə verilib.  

"Reuters" agentliyinin məlumatına əsasən İtaliyanın baş naziri Corciya Meloni üçün zavodun gələcəyi mühüm məsələdir, çünki zavodun bağlanması ölkənin istehsal sektoruna ciddi təsir göstərə bilər.  

Zavodun fövqəladə komissarları yaydıqları açıqlamada təkliflərin “bir neçə gün ərzində” qiymətləndiriləcəyini və nəticələrin sənaye nazirliyinə göndəriləcəyini bildiriblər. 

Rəhim