"Apple" geri addım atdı, yeni "Siri"ni ən böyük rəqibinə etibar etdi

Texnologiya dünyasında balansları dəyişdirə biləcək əməkdaşlıq rəsmi şəkildə elan olunub. “Apple” uzun müddətdir maraqla gözlənilən “yeni nəsil Siri” layihəsi üçün daxili inkişaf proseslərini dayandıraraq istiqaməti “Google”a çevirib. 

Valyuta.az xəbər verir ki, “WWDC 2024” tədbirində verilən vədlərdən sonra yaşanan gecikmələr, “Apple”ın süni intellekt yarışında sürəti artırmaq məqsədilə “Google”ın “Gemini” modellərinə güvənəcəyini göstərir.

“Apple”, “Siri”ni daha ağıllı və fərdiləşdirilmiş bir köməkçiyə çevirmə yolunda mühüm mərhələni geridə qoyub. Şirkət açıqlayıb ki, yeni nəsil “Apple Foundation” modellərinin əsasını “Google”ın “Gemini” texnologiyası və bulud infrastrukturu təşkil edəcək. Bu addım, texnologiya nəhənginin hələlik öz daxilində “sərhədləri aşan” səviyyədə bir süni intellekt modeli yarada bilmədiyinin də dolayısı ilə etirafı kimi dəyərləndirilir.

“Apple” tərəfindən verilən məlumata görə, “Google”un təqdim etdiyi texnologiya istifadəçi təcrübəsini ən yüksək səviyyəyə daşıya biləcək ən uyğun baza kimi qiymətləndirilib. “Apple Intelligence” çətiri altında təqdim edilən funksiyaların böyük hissəsi artıq bu əməkdaşlıq sayəsində reallaşdırılacaq.

Milyard dollarlıq əməkdaşlıqda məxfilik prioritetdir

“Bloomberg”in ötən ilin sonlarında yaydığı məlumatlara əsasən, bu böyük tərəfdaşlığın illik dəyəri təxminən 1 milyard dollara çatır. “Apple” bir tərəfdən “Google”un texnoloji gücündən yararlanarkən, digər tərəfdən istifadəçilərin ən çox narahat olduğu məxfilik məsələsində də təminat verir. Şirkət bildirir ki, “Apple Intelligence” cihazdaxili emal və “Xüsusi Bulud Hesablama” (“Private Cloud Compute”) sistemi üzərindən işləməyə davam edəcək və bununla da yüksək təhlükəsizlik standartlarından geri addım atılmayacaq.

ChatGPT dövrü başa çatır?

“Google” ilə bağlanan bu çoxillik razılaşma, “Apple”ın daha əvvəl “OpenAI” ilə qurduğu əməkdaşlığın gələcəyini də sual altına salıb. “iOS” ekosisteminə inteqrasiya olunan ChatGPT-nin seçim olaraq qalacağı, yoxsa tamamilə “Gemini” əsaslı “Siri”yə keçidin ediləcəyi hələlik dəqiqləşməyib.

İlin irəliləyən dövrlərində istifadəyə veriləcək yeni texnoloji infrastruktur, “Siri”nin illərdir tənqid olunan ləngliyindən xilas olub-olmayacağını da aydın şəkildə ortaya qoyacaq.

Paşa Məmmədli