ABŞ-ın enerji nəhənglərinin mənfəəti kəskin azaldı

ABŞ-ın enerji nəhəngləri “Chevron” və “ExxonMobil” 2025-ci ilin dördüncü rübünə dair maliyyə hesabatlarını açıqlayıb.

Valyuta.az xəbər verir ki, açıqlanan məlumatlara görə, “Chevron”un xalis mənfəəti ötən ilin son rübündə illik müqayisədə 14,5 faiz azalaraq 2,8 milyard dollara enib. Şirkət 2024-cü ilin eyni dövründə 3,2 milyard dollar mənfəət əldə etmişdi.

“Chevron”un 2024-cü ilin son rübündə səhm başına 1,84 dollar olan xalis mənfəəti isə ötən ilin eyni dövründə 1,39 dollara düşüb. Şirkətin 2025-ci il üzrə ümumi mənfəəti də illik müqayisədə 30,4 faiz azalaraq 12,3 milyard dollar təşkil edib.

“Chevron”un gəliri ötən ilin dördüncü rübündə 10,2 faiz azalaraq 46,9 milyard dollara enib. 2025-ci ilin yekununda isə gəlir 6,8 faiz azalaraq 189 milyard dollar olub.

“ExxonMobil”in xalis mənfəəti də ötən ilin dördüncü rübündə illik müqayisədə 14,6 faiz azalaraq 6,5 milyard dollara düşüb. Şirkət əvvəlki ilin eyni dövründə 7,6 milyard dollar mənfəət açıqlamışdı.

Enerji nəhənginin 2024-cü ilin son rübündə səhm başına 1,72 dollar olan xalis mənfəəti ötən ilin eyni dövründə 1,53 dollara enib. “ExxonMobil”in 2025-ci il üzrə ümumi mənfəəti də illik müqayisədə 14,4 faiz azalaraq 28,8 milyard dollara geriləyib.

Şirkətin gəliri ötən ilin dördüncü rübündə 1,3 faiz azalaraq 82,3 milyard dollar olub. 2025-ci ilin yekununda isə gəlir 5 faiz azalaraq 332,2 milyard dollara düşüb.

Paşa Məmmədli