9 milyard dəyərləndirmə ilə 400 milyon dollar investisiya aldı

Kibertəhlükəsizlik sahəsində fəaliyyət göstərən “Cyera” şirkəti 400 milyon dollar məbləğində F seriyalı investisiya raundunu tamamlayıb. 

Valyuta.az xəbər verir ki, “Cyera” bundan əvvəl 6 milyard dollar dəyərləndirmə ilə 540 milyon dollar investisiya cəlb etmişdi.

Yeni raunddan sonra 2021-ci ildə təsis edilən şirkətin ümumi dəyərləndirməsi 9 milyard dollara yüksəlib. “Cyera” bu günə qədər ümumilikdə 1,7 milyard dollar investisiya toplayıb.

Şirkətin məlumatına görə, yeni cəlb olunan vəsait məhsul inkişafının sürətləndirilməsi, süni intellekt əsaslı məlumat təhlükəsizliyi imkanlarının genişləndirilməsi, həmçinin qlobal bazarlarda satış və əməliyyat potensialının artırılması məqsədilə istifadə ediləcək.

“Cyera” 2021-ci ildə Yotam Segev və Tamar Bar-İlan tərəfindən təsis edilib. Şirkət müəssisələrin bulud sistemləri və verilənlər bazaları üzrə həssas məlumatların yerini avtomatik müəyyən edən, bu məlumatları növünə və risk səviyyəsinə görə təsnif edən platforma təqdim edir.

Platforma vasitəsilə şəxsi məlumatlar, maliyyə informasiyaları və tənzimləmələrə tabe olan digər kritik məlumatlar görünən hala gətirilir.

Mayya Hüseynova