Tehranda 26 bank və 10 dövlət obyekti yandırılıb – Mer

Ötən sutka ərzində İranda keçirilən etiraz aksiyaları zamanı paytaxt Tehran şəhərində 26-dan çox bank filialı və 10 dövlət obyekti yandırılıb.

Trend-in məlumatına görə, bunu Tehran meri Əlirza Zakani yerli mediaya açıqlamasında deyib.

Onun sözlərinə görə, iğtişaşçılar tərəfindən paytaxtda 25-dən çox məscid və 47 avtobus da yandırılıb.

Zakani bildirib ki, həmçinin iğtişaşçılar 3 polis bölməsinə və 25 “Bəsic” bölməsinə hücum ediblər. Onlar istənilən cinayətə əl atıblar.

Tehran meri əlavə edib ki, hazırda etirazlarda iğtişaşçılar üç dəstəyə bölünürlər. Birinci dəstə müxtəlif qrupların təşviqinə aldanaraq küçələrə axışır və cinayətlər törədirlər. Onlar konkret məqsədi olmayan və emosiyalara qapılmış gənc qızlar və oğlanlardır. Lakin məhz bu şəxslər iğtişaşçılar tərəfindən atəşə tutularaq öldürülüb. İkinci dəstə quldurlardır və əllərinə keçən əmlakı qarət etməklə məşğuldur. Üçüncü dəstə isə hakimiyyəti devirmək üçün çalışır. İranın Məhkəmə Sisteminin qərarına əsasən üçüncü dəstə birbaşa cinayətə cəlb olunacaq şəxslərdir.

Qeyd edək ki, dekabr ayının sonlarından İranın milli valyutası rialın xarici valyutalar qarşısında kəskin dəyər itirməsi, yüksək inflyasiya və digər iqtisadi problemlərə görə etiraz aksiyaları başlayıb. Etirazlarda ölən və yaralananları olduğu bildirilsə də, say haqda məlumat verilməyib.