Bütün peşə sinifləri yox olacaq: Sem Altman 2030-cu illərin dünyasını təsvir etdi

"OpenAI" texnologiya startapının rəhbəri və "ChatGPT" layihəsinin memarı Sem Altman süni intellektin yaxın illərdə dünyada əhəmiyyətli dəyişikliklərə səbəb olacağını bildirib. 

Valyuta.az-ın məlumatına görə, o, öz bloqunda qeyd edib ki, süni intellekt texnologiyaları həm elmi tərəqqini sürətləndirəcək, həm də əmək məhsuldarlığını artıraraq bəşəriyyətin daha sürətlə varlanmasına şərait yaradacaq.

Altman yazır: "Süni intellekt həyat keyfiyyətinin yüksəldilməsində, elmi inkişafın və əmək məhsuldarlığının sürətləndirilməsində böyük rol oynayacaq. Gələcək bu günlə müqayisədə xeyli yaxşı ola bilər".

Onun sözlərinə görə, ChatGPT artıq bu gün milyonlarla insanın gündəlik əhəmiyyətli işlərində istifadə etdiyi vasitəyə çevrilib və insanlıq üzərində daha əvvəl heç bir texnologiyanın etmədiyi qədər təsir göstərir.

Altman qeyd edir ki, neyron şəbəkələr artıq proqram kodları yazır və 2026-cı ildə yeni ideyalar yarada bilən sistemlərin ortaya çıxması, 2027-ci ildə isə fiziki dünyada real iş görə bilən robotların meydana gəlməsi mümkündür.

Altmanın fikrincə, süni intellekt insanların proqramlaşdırma və yaradıcılıq imkanlarına çıxışını asanlaşdıracaq. Mütəxəssislər yenə də bu sahədə üstün olacaqlar, lakin artıq 2030-cu ildə adi bir insanın bacarıqları 2020-ci illə müqayisədə daha geniş olacaq.

Bununla belə, Altman qeyri-real gözləntilərdən çəkinməyə çağırır: "2030-cu illərdə həyat bu günkindən tam fərqli olmayacaq - insanlar ailələrini sevəcək, istirahətə gedəcək, oyunlar oynayacaqlar. Amma bəzi sahələrdə radikal dəyişikliklər baş verəcək".

Altman yazır ki, alimlər artıq süni intellektin məhsuldarlığı 2-3 dəfə artırdığını bildirirlər. Əgər əvvəllər onilliklər tələb edən tədqiqatlar indi bir ilə, bəzən bir aya başa çatırsa, tərəqqinin tempi tamamilə fərqli olacaq.

"Əgər biz bir milyon insanabənzər robotu köhnə üsulla hazırlasaq, lakin sonradan bu robotlar tədarük zəncirinin bütün mərhələlərini – faydalı qazıntıların çıxarılması, emalı, yük daşıması, zavodlarda işləməsi – öz üzərinə götürərək daha çox robot istehsal edə bilərlərsə, o zaman texnoloji tərəqqinin həcmi tamamilə dəyişəcək", deyə Altman qeyd edir.

Sem Altmanın fikrincə, texnologiyanın sürətlənməsi və süni intellektin yayılması insanı tarix səhnəsindən silməyəcək. Lakin bu proses ağrısız olmayacaq - bütün bir peşə sinifləri yoxa çıxa bilər. Bununla belə, dünya sürətlə zənginləşəcək və yeni imkanlar yaranacaq.

Altman əlavə edir: "2035-ci ilə qədər nələr kəşf ediləcəyini bu gün təsəvvür etmək çətindir. Ola bilər ki, yüksək enerjili fizika sahəsində bir il içində böyük kəşf baş verəcək, növbəti il isə kosmosun kolonizasiyasına başlanacaq. Ya da yeni materialların hazırlanması sahəsində inqilabdan sonra süni intellektlə işləyən beyin-kompüter interfeysləri inkişaf edəcək. Bəzi insanlar həyatlarına əvvəlki kimi davam edəcək, amma digərləri özlərini "bağlanmış" hiss edəcək".

Paşa Məmmədli