Dövlət Sərhəd Xidməti ilə "Vitta Elmi-Texniki" MMC (VÖEN: 1000293781) arasında yeni milyonluq müqavilə imzalanıb.

Valyuta.Az xəbər verir ki, imzalanan müqavilə müqabilində MMC Dövlət Sərhəd Xidmətini rentgen filmləri, fotolaboratoriya üçün reaktivlər, cərrahiyyə üçün tikiş materialları və stomatologiya üçün məsrəfi materiallarla təmin edəcək. 

Müqavilənin dəyəri 1.195.976,85 manatdır.

Qeyd edək ki, bu tərəflər arasında ilk belə milyonluq müqavilə bağlanması deyil. Tərəflər arasında öncələr də bir neçə dəfə müxtəlif xidmətlər müqabilində dəyəri milyon manatdan çox olan müqavilələr imzalanıb.

Məsələn, 
- 30 may 2023-cü ildə gəmi və katerlər üçün xüsusi yağlar və mayelərin alınması ilə bağlı 1.032.728,09 manat

- 21 iyun 2024-cü ildə gəmi, kater, aviasiya texnikalarında istifadə olunan xüsusi yağlar, mayelər və Aviasiya yanacağının (Avqaz 100LL) alınması ilə bağlı 2.273.774,78 manat,
    
- 09 avqust 2024-cü ildə tibbi avadanlıqların alınması ilə bağlı 3.460.498,68 manat müqavilələr imzalanıb. 

Bunlardan savayı tərəflər arasında yüz minlik müqavilələr də imzalanıb. 

Dövlət satın almaların vahid internet portalına nəzər saldıqda MMC-nin digər qurumlarla da milyonluq müqavilələr imzaladığı ortaya çıxır. 

Məsələn,

- Azərbaycan Qida Təhlükəsizliyi İnstitutu, Koronavirus (COVİD-19) infeksiyası ilə əlaqədar laborator analizlərin aparılması üçün diaqnostik dəstlərin, avadanlıqların və ləvazimatların, fərdi mühafizə vasitələrinin, laboratoriya materiallarının və s. satın alınması üçün MMC-yə 1.002.999,65 AZN,

İcbari Tibbi Sığorta üzrə Dövlət Agentliyi, tibb müəssisələri üçün tibbi avadanlıqların və tibbi alətlərin satın alınması (II elan) üçün MMC-yə 6.665.115,21 AZN,

İnnovasiya və Təchizat Mərkəzi isə MMC-yə tibb müəssisəsi üçün tibbi cihaz və avadanlıqların satın alınması üçün 2.787.868 AZN, uşaqların icbari dispanserizasiyadan keçirilməsinə dair tədbirlərlə bağlı xərclər çərçivəsində tibbi təyinatlı avadanlıq və ləvazimatların satın alınması üçün 2.091.314 AZN, Nərimanov Tibb Mərkəzində istifadə üçün nəzərdə tutulmuş tibbi avadanlıq, cihaz, alət və tibbi inventarların satın alınması üçün 5.816.360,42 AZN ödəyib. 

Qeyd edək ki, "Vitta Elmi-Texniki" MMC 2008-ci ildə dövlət qeydiyyatına alınıb. 1000 ABŞ dolları nizamnamə kapitalına malik şirkətin qanuni təmsilçisi Quliyev Kamil Bəşir oğludur. Onun haqqında açıq mənbələrdə heç bir məlumata rast gəlinmir.

Həmçinin onu da əlavə edək ki, şirkətə bir neçə dəfə qanun pozuntusuna görə maliyyə sanksiyası tətbiq edilmişdir.

Rəhim