Yeni ildə harada əylənmək olar?

Yeni il yaxınlaşdıqca Bakı da öz ənənəvi bayram ab-havasına bürünür. Şəhərin küçələri işıqlanır, vitrinlər bəzədilir, restoranlar və əyləncə məkanları xüsusi proqramlara hazırlaşır. Bu dövrdə bir çoxları üçün əsas sual eyni qalır: Yeni ili harada və necə qarşılamaq daha yaxşıdır? Seçimlərin çoxluğu isə bəzən qərar verməyi daha da çətinləşdirir.

Valyuta.az məhz buna görə, Yeni il ərəfəsində Bakıda edilə biləcək aktivlikləri əhval-ruhiyyəyə uyğun şəkildə kateqoriyalar üzrə topladıq.

Yeni ili hiss etməyin ən asan yolu şəhərin öz ritminə qarışmaqdır. Bu baxımdan Bakı kifayət qədər alternativ təqdim edir. İçərişəhərdə axşam gəzintisi Yeni il ərəfəsində xüsusilə cəlbedici olur. Tarixi daş küçələr, sarı işıqlar, sakitlik və romantik ab-hava şəhərin səs-küyündən uzaqlaşmaq istəyənlər üçün ideal seçimdir. Burada sadəcə gəzmək, isti qəhvə içmək və bayram ab-havasını hiss etmək kifayətdir.

Dənizkənarı Bulvar isə daha geniş və açıq məkandır. Yeni il dekorasiyaları, işıqlandırılmış ağaclar, dəniz mənzərəsi və isti içkilər üçün qurulan köşklər foto çəkməyi sevənlər üçün əlverişli mühit yaradır. Axşam saatlarında Bulvar həm ailələr, həm də dost qrupları üçün ən çox seçilən yerlərdən birinə çevrilir.

Fəvvarələr Meydanı isə daha canlı və səs-küylü atmosfer axtaranlar üçündür. Burada bayram günlərində küçə musiqiçiləri, gənclərin toplaşdığı məkanlar və ümumi şənlik abu-havası üstünlük təşkil edir. Şəhərin “ürək döyüntüsü”ni hiss etmək istəyənlər üçün bu məkan ideal sayılır.

Restoran və gala gecələri: hazır proqramla Yeni il

Yeni ili rahat və planlaşdırılmış şəkildə keçirmək istəyənlərin əksəriyyəti restoran və gala gecələrinə üstünlük verir.

Canlı musiqili restoranlar bu dövrdə xüsusilə populyardır. Jazz, pop, retro və ya milli musiqi proqramları ilə çıxış edən məkanlar həm yemək, həm də əyləncəni bir arada təklif edir. Bu tip restoranlar adətən uzun proqram, fasiləsiz musiqi və bayram menyusu ilə seçilir.

Otellərdə təşkil olunan gala gecələri isə daha genişmiqyaslı əyləncə axtaranlar üçündür. Şou proqramlar, DJ çıxışları, aparıcılar və xüsusi Yeni il menyuları bu gecələrin əsas elementləridir. Üstəlik, gecənin sonunda oteldə qalmaq imkanı da əlavə rahatlıq yaradır.

Son illər Bakıda “roof-top” restoranlara maraq da artıb. Şəhərə yuxarıdan baxış, gecə işıqları və xüsusi Yeni il proqramı bu məkanları romantik və fərqli edən əsas amillərdəndir. Daha intim və estetik atmosfer axtaranlar üçün bu seçimlər ön plana çıxır.

Konsert və gecə həyatı: enerjili və dinamik Yeni il

Yeni ili yüksək enerji ilə qarşılamaq istəyənlər üçün konsert və gecə həyatı əsas alternativlərdən biridir.

Dekabrın son günlərində Bakıda yerli müğənnilərin, musiqi qruplarının və orkestr kollektivlərinin iştirakı ilə Yeni il konsertləri təşkil olunur. Bu tədbirlər adətən geniş auditoriya üçün nəzərdə tutulur və klassik bayram ab-havası yaradır.

Gecə klubları və barlar isə daha dinamik seçimdir. DJ setlər, tematik gecələr, xüsusi dekorasiya və gənclərə xas atmosfer bu məkanları xüsusilə populyar edir. Dostlarla əyləncəli və hərəkətli Yeni il gecəsi planlayanlar üçün bu variant daha uyğundur.

Daha sakit və alternativ seçimlər: stresssiz Yeni il

Hamı Yeni ili səs-küy və izdiham içində keçirmək istəmir. Daha sakit və rahat formatlara üstünlük verənlər üçün də alternativlər mövcuddur.

Kinoteatr və kafe planı sadə, amma rahat seçimdir. Bayram filmləri, isti içkilər və sakit mühit ilin son günlərini yüngül şəkildə başa vurmaq istəyənlər üçün idealdır.

SPA və wellness mərkəzləri isə ilin yorğunluğunu üzərindən atmaq istəyənlər üçün uyğun variantdır. Masaj, sauna və istirahət proqramları Yeni ili daha balanslı və sakit şəkildə qarşılamağa imkan verir.

Bundan əlavə, dostlarla ev formatında Yeni il də aktual seçimlərdəndir. Masa oyunları, film gecəsi, evdə hazırlanmış isti içkilər və səmimi atmosfer bəzən ən bahalı proqramlardan daha dəyərli ola bilir.

Sərvanə Rəmixanova