Son 10 ildə Azərbaycanda sığorta bazarında nə dəyişib?

Son 10 ildə Azərbaycanda sığorta sahəsində dəyişikliklər var.  Bu dövrdə əvvəl mövcud olan qaydaların bəziləri ləğv edilib, bəziləri yenilənib. Bu insanların sığortaya olan münasibətini də dəyişib. Bəs bu dəyişikliklər hansılardır? 

Sığorta eksperti Vüsal Bədəlov Valyuta.az-a bildirdi ki, əsas dəyişiklik həyat yaşam sığortasında limitlərlə bağlı olub: “Əvvəllər bir şəxs maaşının 80%-ni həyat yığım sığortasına yönəldə bilirdi, lakin indi əməkhaqqının 40%-dən artığını həyat yaşam sığortasına yönəltmək mümkün deyil”.

Onun sözlərinə görə, əmlak sığortası ilə bağlı son illər dəyişiklik olmayıb: “Əvvəl olduğu kimi Bakı şəhəri üzrə sığorta haqqı 50 manat, azadolma məbləği 250 manat,  təminatı 25 min manatdır. Gəncə, Naxçıvan, Sumqayıtda sığorta haqqı 40 manat, təminat 20 min manat, azadolma məbləği 200 manatdır. Digər şəhər və bölgələrimizdə sığorta haqqı 30 manat, təminat 15 min manat, azadolma 150 manat təşkil edir”. 

O deyir ki, bu illərdə dəyişiklik sığorta blankları ilə bağlı olub: “Əvvəllər sığorta müqaviləsi, əsasən də icbari sığorta rəsmiləşdirildikdə sığorta blankları mövcud idi. Həmin blankların yazılması qiymətli kağız hesab olunurdu və avtomobilin sığortalanması həmin kağızın müştəridə olması hesab edilirdi. Növbəti illərdə həmin müqavilələr elektronlaşdı. Müqavilə elektron formada mövcud olduqda PDF formasında əldə etmək mümkündür. Əvvəllər bu blanklar əl ilə yazılırdı. Artıq İcbari Sığorta Bürosunun Ədliyyə Nazirliyi və Daxili İşlər Nazirliyi ilə inteqrasiyası olduğu üçün müqavilə yazılarkən avtomobilin sadəcə dövlət qeydiyyat nömrəsi, sürücünün şəxsiyyət vəsiqəsinin FİN kodu və sürücülük vəsiqəsinin nömrəsinin daxil edilməsi kifayətdir. Ən əsas üstünlüyü isə əvvəl texniki səhvlərə görə sığorta müqaviləsi sistemə səhv düşürdüsə, artıq belə problemlər aradan qalxıb”.

“Bundan əlavə, avtomobillərin icbari sığortasında 2023-cü il oktyabrın 1-dən sığorta haqqının hesablanma qaydası dəyişib. Əvvəl avtomobilin icbari sığortası 2 əmsal əsasında hesablanırdı. Avtomobilin tipinə və hadisə keçmişinə görə əmsal tətbiq olunurdu. İndi isə 7 əmsala görə tətbiq olunur. Buna avtomobilin tipi, hadisə keçmişi, sürücülük təcrübəsi, sürücünün yaşı, avtomobilə görə olan etibarnamə və nəqliyyat vasitəsinin idarə olunduğu yer nəzərə alınır. Hüququ şəxslər əvvəl fiziki şəxslərə nisbətən 20% baha idi. İndi isə 40% əmsal tətbiq olunur” - deyə V.Bədəlov qeyd edib.

 Şəbnəm İbrahimxəlilova