Nazirlik bu şirkətə 245 milyon manata yaxın faizsiz kredit verib

Bu il “Bakı Metropoliteni” QSC-yə dövlət tərəfindən bir sıra maliyyə dəstəyi ayrılıb.

Valyuta.az xəbər verir ki, Hökumət tərəfindən aşağı sərnişindaşıma tarifləri səbəbindən yaranan zərərlərin kompensasiyası üçün şirkətə 42,662 milyon manat subsidiya ayrılıb.

Bununla yanaşı, əsas tikinti və təmir işlərinin maliyyələşdirilməsi, yeni vaqonların alınması və infrastrukturun inkişafı məqsədilə 73,630 milyon manat məbləğində kapital vəsaiti təqdim edilib.

Cari ilin fevralın 20-də “Bakı Metropoliteni” Maliyyə Nazirliyindən 244,800 milyon manat məbləğində faizsiz kredit alıb. Bu vəsaitin ilin sonunda geri qaytarılması nəzərdə tutulur.

İyulun 24-də isə şirkətin Tikinti bölməsi ləğv edilib. Həmin bölmənin funksiyaları ixtisaslaşmış təşkilatlara ötürülüb. Verilən məlumata görə, bu addım tikinti idarəçiliyində çevikliyin və səmərəliliyin artırılması, eyni zamanda korporativ strukturun sadələşdirilməsi və idarəetmə xərclərinin azaldılması məqsədi daşıyır.

Bununla yanaşı, Rəqəmsal İnkişaf və Nəqliyyat Nazirliyinin Kollegiyası tərəfindən 1 oktyabr 2025-ci ildən etibarən metroda gediş haqqının 50 qəpikdən 60 qəpiyə qaldırılması qərara alınıb. Tarif artımı sərnişindaşıma xidmətlərinin keyfiyyətinin yüksəldilməsi məqsədi daşıyır.

Mayya Hüseynova