Böyük pulları tərk edən CEO-lar - SƏHƏR OXUSU

Biznes dünyasında uğur çox vaxt sərvət, vəzifə və statusla ölçülür. Amma son illərdə diqqətçəkən bir tendensiya formalaşıb: yüksək maaşlı və nüfuzlu vəzifələrdə çalışan bəzi CEO-lar öz imperiyalarını geridə qoyaraq tamamilə başqa həyata üz tuturlar.

Valyuta.az xəbər verir ki, bu insanların seçimi iqtisadiyyat üçün də mühüm siqnaldır - çünki korporativ uğurun arxasında görünməyən bir problem dayanır: tükənmə sindromu.

Korporativ rəhbərlik səviyyəsində tükənmə sindromu artıq təsadüfi hal deyil. Çünki CEO vəzifəsi yalnız strateji qərarları deyil, həm də fasiləsiz məsuliyyət dövrəsini tələb edir. Bu təzyiq bəzən elə səviyyəyə çatır ki, liderlər milyonlarla dollar gəliri belə kənara qoyub həyatını yenidən qurmağa üstünlük verirlər.

Dünyanın tanınmış texnologiya şirkətlərindən birinin rəhbəri olan Tony Hsieh uzun illər “Zappos”da qurduğu uğurlu korporativ mədəniyyətlə məşhurlaşmışdı. Lakin o, yüksək tempdə işləməyin yaratdığı psixoloji yüklənmə ilə bağlı açıqlamalar verirdi və sonrakı illərdə korporativ həyatdan uzaqlaşıb daha sadə layihələrə yönəldi. Onun hekayəsi “başarı maksimuma çatanda belə insanın psixoloji ehtiyacları geridə qalmır” fikrini gücləndirdi.

Digər bir nümunə “Bumble”un qurucusu Uhitni Vulf Herd oldu. O, gənc yaşda milyardlıq platforma yaratdı, IPO-dan sonra isə CEO postundan kənara çəkilərək həyat ritmini dəyişdirdi. Verdyi açıqlamalarda o, gərgin korporativ mühitin, davamlı diqqət mərkəzində olmağın və liderlik təzyiqinin şəxsi rifaha necə təsir etdiyini vurğulayırdı. Onun geri addımı qadın liderlərin belə eyni psixoloji yükdən təsirləndiyini göstərdi.

Yalnız texnologiya sahəsində deyil, maliyyə və istehsal sektorlarında da oxşar hallar müşahidə olunur. Pərakəndə satış şirkətlərindən birinin rəhbəri John Mackey “Whole Foods”dan ayrılarkən bildirmişdi ki, biznesi böyütməkdən çox, şəxsi həyatının ritmini bərpa etmək və “daha balanslı bir həyat yaratmaq” istəyir. Onun gedişindən sonra korporativ mədəniyyət və iş ritmi mövzusu yenidən gündəmə gəldi.

Bu hekayələrin ortaq nöqtəsi odur ki, liderlik yalnız qərarvermə qabiliyyəti ilə ölçülmür - davamlı psixoloji dayanıqlıq da mühüm faktordur. Yüksək gəlir və prestij biznes dünyasında ən böyük cazibələrdir, amma onlar insanı uzun müddət qoruyan mexanizmlər deyil. Bu səbəbdən CEO-ların bir qismi yeni başlanğıc üçün yavaş həyat modelini seçir: daha az stress, daha şəxsi vaxt, daha çox mənəvi rahatlıq.

Maraqlıdır ki, bu tendensiya yalnız fərdi seçim deyil. Bəzi investorlar və iş psixoloqları qeyd edir ki, liderlərin tükənməsi şirkət performansına da təsir edir. Yüksək səviyyəli rəhbərlərin istənilən an geri çəkilə bilməsi korporativ idarəetmədə yeni suallar yaradır: daha davamlı liderlik modeli necə olmalıdır? Şirkətlər CEO rifahını nə dərəcədə nəzərə almalıdır?

Tarix göstərir ki, hər yeni iqtisadi tendensiyanın arxasında insan faktoru dayanır. Bu gün böyük pulları tərk edib sadə həyata keçən CEO-ların sayı artdıqca, korporativ dünyanın prioritetləri də dəyişir. Uğur artıq yalnız maliyyə nəticələri ilə deyil, həm də insanın özünü necə hiss etməsi ilə ölçülməyə başlayır.

Mayya Hüseynova