Bill Qeyts və Stiv Cobsun rəqabəti necə başladı? - Biznes filmləri

Valyuta.az həftə sonu izləmək üçün biznes və texnologiya dünyasını əks etdirən filmləri təqdim edir.

Bu həftə üçün seçimimiz “Silikon vadisinin quldurları” (“Pirates of Silicon Valley”) filmidir.

1999-cu ildə çəkilmiş bu televiziya filmi, texnologiya tarixinin formalaşmasında böyük rol oynamış iki nəhəngin - “Apple” və “Microsoft” şirkətlərinin yaranma və inkişaf hekayəsini əhatə edir. Film Stiv Cobs və Bill Qeytsin gənclik dövrünü, onların sahibkarlıq ruhunu və rəqabətə necə girdiklərini göstərir.

Film Pol Freyberqin və Maykl Sveyinin “Fire in the Valley: The Making of the Personal Computer” adlı kitabı əsasında çəkilib. Rejissoru Martın Börk olan ekran əsərində Noah Wyle Stiv Cobs, Anthony Michael Hall isə Bill Qeyts rolunu ifa edir. Film, kompüter inqilabının başlanğıc dövrünü, universitet laboratoriyalarından başlayıb milyardlarla dollar dəyərində imperiyalara çevrilən texnologiya ideyalarını ekranlaşdırır.

“Silikon vadisinin quldurları” fərdi kompüter anlayışının necə formalaşdığını, bu sahədəki yaradıcılıq və texnoloji yarışın detallarını və bir çox hallarda sərhədlərin necə aşılaraq rəqabətin “piratlıq” səviyyəsinə keçdiyini göz önünə sərir. Film boyu Stiv Cobs ilə Bill Qeytsin fərqli liderlik tərzləri və texnologiyaya yanaşmaları açıq şəkildə əks olunur: Cobs idealist və karizmatik, Qeyts isə daha strateji və fürsətçi bir obraz kimi təqdim edilir.

Bundan əlavə, film yaradıcılıqla etikanın toqquşmasını önə çıxarır. Qeytsin proqram təminatını qeyri-rəsmi yollarla əldə etməsi və Cobsun əməkdaşlarına qarşı sərt davranışları texnologiyada etik dəyərlərin necə pozula bildiyini göstərir. Uğur hekayələrinin arxasında isə ciddi şəxsi itkilər, emosional gərginlik və insan münasibətləri dayanır – xüsusilə Cobsun qızı ilə münasibətləri bu baxımdan diqqətəlayiqdir.

Filmin başqa bir maraqlı tərəfi, texnoloji imperiyaların təvazökar başlanğıclarla qurulmasıdır. Həm Cobs, həm də Qeyts universitet illərində sadə şəraitdə işə başlayaraq qlobal təsir gücünə malik şirkətlər yaratmağı bacarıblar. Bu, gənc sahibkarlar üçün motivasiyaedici bir nümunədir. Filmdə “Apple” və “Microsoft”un bazara çıxması, IBM ilə əməkdaşlıqlar və ilk fərdi kompüter layihələri kimi real tarixi hadisələr də yer alır.

Qeyd edək ki, “Silikon vadisinin quldurları” ("Pirates of Silicon Valley") 1999-cu ildə TNT telekanalı üçün çəkilmiş televiziya filmidir. Bu səbəbdən, onun istehsal büdcəsi və gəliri barədə rəsmi və dəqiq məlumatlar mövcud deyil. Ənənəvi kinoteatr nümayişi olmadığı üçün film kassada gəlir əldə etməyib. Lakin bəzi mənbələrə görə, filmin istehsal büdcəsi təxminən 15 milyon dollar civarındadır.

Maya Hüseynova