"Təlimlərdə əməkdaşla birlikdə rəhbər də iştirak etməlidir, çünki..."

Elşən Bədirxanov
     İdarəetmə üzrə konsultant, təlimçi, mentor

Hrworld-un məlumatına əsasən dünya üzrə L&D xərcləri 400 mlrd dolları aşıb. Araşdırmalar göstərir ki, əksər hallarda verilən biliklərin təqribən 10%-i tətbiq edilir. Bu rəqəmləri artırmaq üçün bir neçə vacib amil var, öz təcrübəmdən bəzilərinə toxunacam.

* Məşhur isveç psixoloqu Anders Erikson sübut etmişdi ki, nədəsə peşəkar olmaq üçün vacibi sərf edilən vaxt yox, onu necə sərf etdiyindir. Ən uğurlu insanlar öyrənmə prosesini xırda hərəkətlərə bölürdülər. Məsələn, eyni zərbəni günlərlə məşq edirlər, xırda düzəlişlər edib təkimilləşdirirlər. Erikson bunu “süurlu praktika” adlandırmışdı: çoxsaylı təkrar, dərhal feedback, korreksiya və eksperimentlər.

Hər dəfə təkmilləşdirilmə üçün konkret bir, ən vacib, mövzu seçin. Hərdən bir gün ərzində keçirilən təlimə 10 mövzu daxil edilir və nəticədə fokus itir. Ümumi liderlik əvəzinə daha konkret mövzulardan biri: situativ liderlik, səlahiyyətlərin ötürülməsi, feedback, konfliktlərin həlli və s.

* Hər təlimdən sonra tətbiq planını həyata keçirin. Gözləməyin ki, əməkdaşlarınız özləri sehrli şəkildə təlimdən sonra dəyişəcəklər. Vərdişə düşənədək onlar əsasən birbaşa rəhbəri və HR biznes-tərəfdaşı tərəfindən müşahidə edilməli, dəstək göstərilməli, düzgün feedback-lar verilməli, komanda ilə nəticələr müzakirə edilməlidir.

* Bunu etmək üçün təlimlərdə iştirakçılarla birlikdə onların birbaşa rəhbərləri də iştirak etməlidir. Niyə? Çünki eyni dildə danışmalıdırlar. Bu, həm də əməkdaşları təlimə daha ciddi yanaşmağa sövq edir. Təlimdən sonra birbaşa rəhbər əməkdaşlarına öyrəndiklərini tətbiq etməyə kömək etməlidir (özü nümunə olmaqla), tətbiqi müşayiət edib, düzgün feedback verməlidir. Dəfələrlə şahidi olmuşam ki, rəhbərlər təlimdə iştirakını lazım bilmirlər (hər şeyi bildiklərini hesab edirlər), yaxud özlərinə sığışdırmırlar.

* Təlimə məsul olan şəxslərin (birbaşa rəhbərin və HR-ın) hədəfləri əsasən prosesyönümlü yox, nəticəyönümlü olmalıdır (neçə təlim keçirildi yox, qısa və orta vadəli nəticəsi necə oldu).

* Yeni bilikləri tətbiq etmək üçün şərait olmalıdır: məsələn, səhvlərə görə cəza yox, dəstək mühiti.

Mənə təlim sifariş edən bütün şirkətlərə təklif edirəm ki, ödənişsiz olaraq məsul şəxslərlə birlikdə bir online görüşü əldə edilən biliklərin tətbiqi üzrə addımlar planının hazırlanmasına sərf edək. Bu tədbirlər əməkdaşlarınızın öyrədilməsinə yatırdığınız vəsaiti xərcdən investisiyaya çevirəcək!