Uğurlu sahibkarlar nə edirlər və siz bu bacarıqları necə əldə edə bilərsiniz?

Bəzi insanlar hələ uşaqlıqdan sahibkarlıq ruhuna sahib olurlar. Məsələn, “IKEA” mebel markasının təsisçisi İnqvar Kamprad Stokholm yaxınlığında yerləşən ailə fermasında böyüyüb. O, erkən yaşlarından şəhərə gedərək kibrit qutularını toplu şəkildə alıb kənd sakinlərinə tək-tək sataraq qazanc əldə etməyi öyrənmişdi. Bu kiçik biznesi tədricən genişləndirərək balıq, qələm, karandaş və digər əşyaların satışına başlamışdı. Məktəbdə uğur qazandığı üçün atası ona pul mükafatı verdi və Kamprad bu vəsaitlə Stokholmdan topdansatışla aldığı kiçik mebel parçalarını poçt vasitəsilə satan bir biznes qurdu. Bu sadə ideya zamanla qlobal bir imperiyaya çevrildi.

Bu kimi uğurlu sahibkarlara müvəffəqiyyətin əsas sirrini soruşduqda, adətən “risk edin”, “uğursuzluqdan qorxmayın” kimi tövsiyələr verirlər. Lakin bu ifadələr çox zaman praktikada faydalı olmur.

Bu səbəbdən Valyuta.az sizə birbaşa tətbiq edə biləcəyiniz real addımları təqdim edir - yəni uğurlu sahibkarlar nə edirlərsə, siz də onları necə edə bilərsiniz:

1. Kiçik addımlarla sahibkarlığa başlayın

Hansı bacarığınız və ya bilik sahəniz var ki, ondan əlavə gəlir mənbəyi kimi istifadə edə bilərsiniz? Repetitorluq edə bilərsiniz? Musiqi dərsi verə bilərsiniz? Əl işi hazırlayıb sata bilərsiniz? İtləri gəzdirməyi bacarırsınız? Seçdiyiniz məhsul və ya xidmət üzərində düşünün və plan qurun: Fəaliyyət dairəniz nə olacaq? Qiyməti necə müəyyənləşdirəcəksiniz?  Müştəri cəlb etmək üçün necə reklam edəcəksiniz?

Bu planlaşdırma sizi tədqiqat aparmağa məcbur edəcək və unutmayın — uğurlu sahibkarların hamısı biznesə başlamazdan əvvəl araşdırma aparırlar. Əsas məqsəd odur ki, siz hətta həftə sonları fəaliyyət göstərəcək kiçik bir biznes quraraq uğurlu sahibkarların geniş miqyasda etdiklərini öz miqyasınızda təcrübədən keçirirsiniz. Səhv edəcəksiniz — bu yaxşıdır. Çünki hər səhv bir öyrənmə təcrübəsidir və siz bu təcrübəni heç bir seminar və ya kursda əldə edə bilməzsiniz.

2. Uğurlu sahibkarların həyat hekayələrini oxuyun

Bu tip hekayələri hər gecə yatmazdan əvvəl oxuyun. Onların necə plan qurduqları, məqsəd qoyduqları, bazarı sınadıqları, brendlərini təqdim etdikləri və müştəri münasibətlərini necə qurduqları ilə bağlı praktik nümunələr sizə böyük fayda verəcək.

3. Bizneslərin sosial mediada necə reklam etdiyini öyrənin

Əgər siz “Facebook” istifadəçisisinizsə, bəzi məhsulları araşdırdıqdan sonra həmin məhsulların reklamlarının sağ tərəfdə və ya xəbər lentinizdə göründüyünü müşahidə etmisiniz. Bəs bu necə baş verir?

Əgər sizin biznesiniz onlayn platformada fəaliyyət göstərəcəksə, bu tip marketinq mexanizmlərini öyrənməlisiniz. Bu, sadəcə kitab oxumaqla kifayətlənməyəcək. İnternet marketinq üzrə seminar və ya təlimlərə qoşulun, blog yazılarını oxuyun. Öyrənin ki, bunu özünüz həyata keçirə bilərsiniz, yoxsa kənardan dəstək almaq daha məntiqlidir.

4. Yerli biznes şəbəkələrinə qoşulun

Demək olar ki, hər yerdə sahibkarlar üçün şəbəkələşmə qrupları mövcuddur. Bu qruplara üzv olmaqla, siz artıq özünüzü təcrübəli sahibkarların mühitinə salırsınız. Dinləyin, suallar verin, məsləhətlərə açıq olun. Bu insanlar biznesin ilk mərhələlərini keçib və indi genişlənmə mərhələsindədirlər. Onların təcrübəsi, səhvləri və uğurları sizə dəyərli məlumat verəcək.

Məsələn, siz repetitorluqla bağlı bir xidmət başlatmaq istəyirsinizsə, bu şəbəkədə valideynlər, dayılar, xalalar, nənə-babalar olacaq. Onlar da dost və tanışlarına sizi tövsiyə edə bilərlər. Yönləndirmə (referal) ən sürətli müştəri qazanma yollarından biridir.

5. Sahibkarların necə ünsiyyət qurduğunu öyrənin

Sizin fəaliyyət sahənizə uyğun olan bizneslərin saytlarına baxın. Məzmun necə yazılıb? Blog bölməsi varmı? Yazılar hansı tonda yazılıb?

Biznes və marketinq yazıları, universitetdə öyrəndiyiniz akademik yazı üslubundan çox fərqlidir. Bu yazılar rəsmi deyil, daha səmimi, söhbətvari və mümkün qədər maraqlı üslubda olur. Öz üslubunuzu bu istiqamətdə inkişaf etdirin.

6. Təcrübəli sahibkarla mentorluq əlaqəsi qurun

Əgər sahibkarlıq bacarıqlarınızı inkişaf etdirməkdə ciddi qərarlısınızsa, bu, ən yaxşı addım ola bilər. Mentor olan şəxs sizə planlamadan başlayaraq biznesin qurulmasına qədər bütün mərhələlərdə dəstək verə bilər. Hazırda etdiyiniz işlərlə bağlı birbaşa tövsiyələr və dəyərli məsləhətlər almaq, digər resurslarla müqayisədə daha effektiv nəticə verir.

Tənzilə Ağabalayeva