Türkiyədə uşaqlar üçün sosial media qadağası

Türkiyə hökuməti 13 yaşdan aşağı uşaqların sosial media istifadəsini məhdudlaşdırmağa hazırlaşır. Süni intellekt texnologiyasından istifadə edərək, istifadəçilərin yaşı müəyyən ediləcək. 

Valyuta.Az Türkiyə mediasına istinadən xəbər verir ki, bu barədə Nəqliyyat və İnfrastruktur naziri Abdulkadir Uraloğlu açıqlama verib. Nazir, sosial media platformalarının bu prosesdə məsuliyyət daşıyacağını vurğulayıb.  

Uşaqlar üçün təhlükəsiz mühit  

Sosial media uşaqlar üçün həm fürsətlərlə zəngin, həm də təhlükəli bir məkandır. Dünyanın bir çox ölkəsində hökumətlər uşaqların onlayn təhlükəsizliyini təmin etmək üçün addımlar atır. Türkiyədə də bu istiqamətdə tədbirlər görülür. "CNN Türk"ə müsahibəsində Abdulkadir Uraloğlu bildirib ki, xüsusilə uşaqlara yönəlmiş tətbiqlər vasitəsilə onların təhlükəsizliyini qorumaq məqsədilə addımlar atılır.  

Nazirin açıqlamalarında önəmli məqamlar bunlardır:  

Roblox platforması ilə bağlı addımlar: "Roblox" daxil olmaqla bir sıra platformalarda uyğun olmayan məzmunların aradan qaldırılması tələb edilir. Uşaqların oyun platformalarına girişləri zamanı müxtəlif risklərdən qorunması üçün tədbirlərin görülməsi planlaşdırılır.  

Risklərə qarşı mübarizə: Nazir qeyd edib ki, bəzi məzmunlar uşaqları qumara, cinsi istismara, zorakılığa və digər təhlükəli istiqamətlərə yönəldə bilər. Bu məzmunların tamamilə bloklanması nəzərdə tutulur.  

Sosial media platformaları məsuliyyət daşıyacaq  

Uraloğlu bildirib ki, süni intellekt vasitəsilə istifadəçinin yaşını təxmin etmək mümkündür. Bu texnologiya, uyğun yaşda olmayan şəxslərin müəyyən edilərək platformalardan uzaqlaşdırılmasına imkan yaradacaq.  

Nazir əlavə edib:  

"Biz bunu senzura adlandırmırıq. Məqsəd, uşaqların yaşlarına uyğun olmayan məzmunlardan qorunmasıdır. 13 və ya 16 yaşdan kiçik istifadəçilər üçün məhdudiyyətlər tətbiq olunacaq. Eyni zamanda, bəzi oyun xidmətlərinin gecə saatlarında istifadəsi məhdudlaşdırıla bilər."  

Türkiyədə sosial media istifadəsinin orta göstəricisi gündə 7 saatdır ki, bu, qlobal orta göstəricidən artıqdır. Hökumət, bu istifadənin tənzimlənməsi üçün tədbirlər görməyi planlaşdırır.  

Rəhim