Tramp “Intel” CEO-sunun dərhal istefasını tələb edir

ABŞ Prezidenti Donald Tramp cümə axşamı səhər saatlarında sosial mediada paylaşdığı açıqlamada “Intel” (INTC) şirkətinin baş direktoru Lip-Bu Tanın (Lip-Bu Tan) istefasını tələb edib.

Valyuta.Az-ın verdiyi xəbərə görə, Tramp özünə məxsus “Truth Social” platformasında yazıb: ""Intel"in baş direktoru ciddi şəkildə maraqlar toqquşması yaşayır və dərhal istefa verməlidir. Bu problemin başqa həlli yoxdur. Diqqətiniz üçün təşəkkür edirəm!"

Tanın adı bu ilin mart ayında “Intel”in CEO-su kimi açıqlanmışdı. O, Pat Gelsingerin (Pat Gelsinger) gərgin dövründən sonra vəzifəni təhvil almışdı. Həmin dövrdə şirkətin səhmləri kəskin ucuzlaşmış və çip istehsalçısı süni intellekt yarışında geri qalmışdı. Tanın təyinatı investorlar tərəfindən müsbət qarşılanmış, xəbərin yayıldığı gün şirkətin səhmləri 15%-ə qədər bahalaşmışdı. Vol Strit analitikləri, eləcə də şirkətin indiki və keçmiş rəhbərləri Tanı çətin vəziyyətdə olan şirkəti dirçəldə biləcək ən real namizəd hesab edirdilər.

Trampın paylaşımından sonra cümə axşamı “Intel”in səhmləri 3%-dən çox ucuzlaşıb.

Şirkət Trampın açıqlamalarına cavab olaraq bəyanat yayıb və ABŞ-ın milli və iqtisadi təhlükəsizlik maraqlarının irəlilədilməsinə, həmçinin Prezidentin "Öncə Amerika" siyasəti ilə uyğun investisiyalara, o cümlədən ölkədaxili yarımkeçirici istehsalına sadiq qaldığını vurğulayıb. “Administrasiya ilə əməkdaşlığımızı davam etdirməyi səbirsizliklə gözləyirik,” – bəyanatda bildirilib.

Apreldə “Reuters” Tanın “Walden International” adlı vençur kapital şirkəti vasitəsilə Çin şirkətlərinə etdiyi genişmiqyaslı investisiyaları işıqlandırmışdı. Agentlik xəbər vermişdi ki, şirkət “Çin hökuməti fondları və dövlət müəssisələri ilə birgə 20 fond və şirkətdə investisiyalarını saxlayır”.

Tanın yarımkeçirici sahəsində fəaliyyət göstərən 14 şirkətdə idarə heyəti üzvü və müxtəlif rəhbər vəzifələrdə təcrübəsi var. Ən çox tanınan vəzifəsi çip dizayn proqram təminatı şirkəti “Cadence Design Systems”in baş direktoru olmasıdır.

Trampın paylaşımı onun Senatdakı ən yaxın müttəfiqlərindən biri, respublikaçı Tom Kottonun (Tom Cotton) “Intel” idarə heyətinin sədrinə Tanın Çinlə əlaqələrini sorğulayan məktub göndərməsindən bir gün sonra gəlib.

“‘Intel’ Amerika vergi ödəyicilərinin pullarının məsuliyyətli idarəçisi olmalı və qüvvədə olan təhlükəsizlik qaydalarına əməl etməlidir,” – Kotton yazıb. O, şirkətin “CHIPS” qanunu çərçivəsində aldığı təxminən 8 milyard dollarlıq qrantı xatırladıb. “Cənab Tanın əlaqələri şirkətin bu öhdəlikləri yerinə yetirə biləcəyi ilə bağlı suallar yaradır.”

“Intel” “Yahoo Finance”in şərh sorğusuna dərhal cavab verməyib.

Bernstein şirkətinin analitiki Steysi Rasqon (Stacy Rasgon) Trampın paylaşımından sonra investorlar üçün qeydində belə yazıb: “Lip-Bu yarımkeçirici sənayesində əfsanədir və onun həm Çində, həm də başqa ölkələrdə çoxsaylı şirkətlərlə əlaqələri yaxşı tanınır.”

“Biz Lip-Bunun maraqlar toqquşması yaşadığını düşünmürük, lakin bu administrasiyanın xarakterinə görə onun Çinlə əlaqələri getdikcə mənfi imic formalaşdırır,” – Rasqon əlavə edib. “Və təəssüf ki, digər texnologiya şirkətlərinin rəhbərlərindən fərqli olaraq Lip-Bu, Trampın qəzəbini azalda biləcək şəxsi münasibət qurmayıb.”

“Intel”in səhmləri bu il cəmi 1,8% bahalaşıb ki, bu da “AMD” (AMD), “Broadcom” (AVGO) və bazar lideri “Nvidia” (NVDA) kimi digər çip istehsalçılarının göstəricilərindən xeyli geridədir.

İyulun sonunda “Intel” işçi sayını 15% azaltmaq qərarını açıqlayandan sonra şirkətin səhmləri düşmüşdü. Bu addım xərcləri ixtisar etmək və zəifləyən çip istehsalı biznesini canlandırmaq məqsədi daşıyırdı.

Şirkət həm öz çiplərini layihələndirib istehsal edir, həm də son illərdə üçüncü tərəf müştərilər üçün istehsal xidmətləri göstərməyə çalışır. Lakin bu sahədə hələ ciddi uğur əldə olunmayıb.

Son maliyyə hesabatında “Intel” özünün ən son istehsal texnologiyası olan “18A” prosesini müştərilərinə təqdim etmək planından imtina etdiyini açıqlayıb. Analitiklər bu addımı şirkətin dirçəlişi və rəqib çip istehsalçısı “TSMC” (TSM) ilə rəqabət aparmaq bacarığı üçün həlledici hesab edirdilər.