Süni intellekt “TikTok” fotolarını videoya çevirəcək

“TikTok” fotoları videoya çevirən yeni süni intellekt alətini təqdim edib

Valyuta.az xəbər verir ki, “AI Alive” adlı yeni funksiyanın köməyi ilə istifadəçilər sadəcə bir yazılı təsvir (prompt) daxil etməklə statik fotoları qısa videolara çevirə biləcəklər. Platforma bu aləti “Story Camera” bölməsi vasitəsilə təqdim edir.

“TikTok”un rəsmi bloq yazısında qeyd olunur ki, bu yeni süni intellekt əsaslı funksiya hər kəsin, montaj bacarığı olub-olmamasından asılı olmayaraq, fotolara hərəkət, vizual effektlər və yaradıcı atmosfer əlavə etməklə onları dinamik videolara çevirməsinə imkan verir.
İstifadə qaydası necədir?

İstifadəçi telefonundakı şəkli seçdikdən sonra, təsvir bölməsinə videonun necə görünməsini istədiyini yazır. Məsələn, sistem ilkin olaraq avtomatik “make this photo come alive” (“bu fotonu canlandır”) prompt-u ilə başlayır. Videonun hazırlanması bir neçə dəqiqə çəkə bilər, amma nəticədə ortaya çıxan video cəmi bir neçə saniyəlik olur.

Jurnalist Cey Piters bu aləti test edərkən, bəzi maraqlı nüanslara da rast gəlib. Məsələn, o, bir pişiyin anime üslubunda tullanmasını istəyib, lakin sistem bu istəyə uyğun nəticə yarada bilməyib.

Təhlükəsizlik tədbirləri və etik standartlar

“TikTok” bildirib ki, bu alətin istifadəsi zamanı təhlükəsizlik və etik standartlara əməl olunması üçün avtomatik moderasiya sistemi tətbiq olunur. Sistemin generasiya etdiyi videolar yayımlanmamışdan əvvəl həm yüklənmiş foto, həm də yazılı prompt nəzarətdən keçir. Əlavə olaraq, videonu paylaşmazdan öncə son təhlükəsizlik yoxlaması həyata keçirilir.

Yaradılan videolar “AI tərəfindən yaradılıb” etiketi ilə paylaşılacaq və C2PA metadatası ilə işarələnəcək. Bu yanaşma, platformada süni intellektlə yaradılmış kontentin şəffaflığını təmin etməyə yönəlib.

Sərvanə Rəmixanova