Qlobal münaqişələr zamanı insanlar pullarını qorumaq üçün ən çox hansı aktivlərə üstünlük verirlər?

İran müharibəsi ilə bağlı qeyri-müəyyənlik davam etdikcə, investorlar vəsaitlərini qorumaq üçün daha təhlükəsiz aktivlərə yönəlirlər. Müharibənin nə qədər davam edəcəyi və nəticələrinin necə olacağı ilə bağlı suallar, həmçinin neft qiymətlərində mümkün artım və təchizat zəncirində yarana biləcək problemlər bazarlarda narahatlığı artırır.

COVID-19 pandemiyası dövründə yaşanan iqtisadi sarsıntıların xatirəsi hələ də təzə olduğundan, investorlar yenidən daha təhlükəsiz hesab edilən aktivlərə üz tuturlar və səhmlər kimi riskli investisiyalardan uzaqlaşırlar.

Ekspertlərin fikrincə, müharibə dövründə pulları qorumaq üçün ən etibarlı hesab olunan beş istiqamət bunlardır:

1. Qızıl

Təhlükəsiz investisiya vasitələri arasında qızıl adətən ilk yerlərdə gəlir. Bunun əsas səbəbi onun daxili dəyərə malik olmasıdır. Qızılın dəyəri hökumətlərdən, valyutalardan və ya iqtisadi fəaliyyətin nəticələrindən asılı deyil.

UBS bankının analitikləri bildirirlər ki, qızıl portfelin şaxələndirilməsi üçün effektiv vasitədir və müxtəlif bazar risklərindən qorunmağa kömək edir. Onların sözlərinə görə, qlobal gərginlik artdıqca qızıla tələbat da yüksəlir.

Bridgewater Associates şirkətinin qurucusu Rey Dalio da investorlara portfellərində qızıla yer verməyi tövsiyə edir. O bildirib: “Əgər qızılınız yoxdursa, nə tarixi, nə də iqtisadiyyatı anlayırsınız.”

2. ABŞ xəzinədarlıq istiqrazları

ABŞ dövlət istiqrazları geosiyasi gərginliklər zamanı investorların ən çox üz tutduğu aktivlərdən biridir. Çünki onlar ABŞ hökumətinin tam zəmanəti ilə təmin edilir.

ABŞ Qiymətli Kağızlar və Birja Komissiyasının (SEC) məlumatına görə, bu istiqrazlar dünyada ən təhlükəsiz investisiyalardan hesab olunur. Buna görə də münaqişə və böhran dövrlərində investorlar sabitlik üçün bu aktivlərə üstünlük verirlər.

3. Yüksək gəlirli əmanət və pul bazarı hesabları

Bir çox investor müharibə dövründə səhmlərini və istiqrazlarını sataraq vəsaitlərini nağd şəkildə saxlamağa üstünlük verir. Bu vəsaitlərin bir hissəsi yüksək faizli əmanət və ya pul bazarı hesablarına yerləşdirilir.

Bu hesablar vəsaitin müəyyən gəlir gətirməsini təmin etməklə yanaşı, yüksək likvidlik və sabitlik də təqdim edir.

4. ABŞ dolları

Qlobal qeyri-müəyyənlik dövrlərində ABŞ iqtisadiyyatı və maliyyə sistemi investorlar üçün təhlükəsiz sığınacaq hesab olunur. Bu səbəbdən ABŞ dollarına tələbat artır.

Trade Nation şirkətinin baş bazar analitiki Devid Morrisonun sözlərinə görə, “ABŞ dolları investorlar üçün əsas təhlükəsiz valyuta olaraq qalır.”

5. Müdafiə xarakterli səhmlər

Bəzi şirkətlərin səhmləri iqtisadi çətinliklər zamanı digərlərinə nisbətən daha dayanıqlı olur. İnsanlar iqtisadi vəziyyətdən asılı olmayaraq elektrik enerjisi, nəqliyyat və ərzaq kimi əsas ehtiyaclarını qarşılamağa davam etdikləri üçün bu sahələrdə fəaliyyət göstərən şirkətlər daha sabit gəlir əldə edirlər.

Charles Schwab şirkətinin qeyd etdiyi kimi, istehlakçılar iqtisadi geriləmə dövründə xərclərini azaltmağa çalışsalar da, adətən kommunal xidmətlərə görə ödənişləri dayandırmırlar.

Tənzilə Ağabalayeva