Pulunun bir hissəsini nağd saxla, bir hissəsini banka qoy, qalanını...

Bir çox insan yığımlarını bank hesabına yerləşdirmək və ya investisiya etmək əvəzinə evdə nağd şəkildə saxlamağa üstünlük verir. Bəziləri bunu daha təhlükəsiz hesab edirlər. Bəs pul vəsaitini evdə saxlamaq doğrudanmı düzgün qərardır?

Məsələ ilə bağlı Valyuta.az-a danışan “FINANCE MASTERS GROUP” şirkətinin təsisçisi və baş direktoru, maliyyə və bank eksperti Xəyal Məmmədli bildirib ki, vəsaitin uzun müddət nağd formada saxlanılması iqtisadi və maliyyə baxımından səmərəli deyil. Onun sözlərinə görə, zaman keçdikcə inflyasiya malların və xidmətlərin qiymətini artırır, nəticədə pulun alıcılıq qabiliyyəti azalır: "Pul vəsaitinin nağd şəkildə saxlanılması iqtisadi və maliyyə nöqteyi-nəzərindən səmərəli deyil. Çünki zaman keçdikcə inflyasiya nəticəsində malların qiyməti artır və pul öz dəyərini itirir. Bu isə vəsait sahibinin zərərə məruz qalmasına səbəb olur".

Ekspert hesab edir ki, vəsaitin gəlir gətirən istiqamətlərə yönləndirilməsi daha məqsədəuyğundur:

"Pul vəsaitinin investisiya şəklində yatırılması, biznes fəaliyyətində istifadə olunması və ya gəlir gətirən aktivlərə – səhmlərə və istiqrazlara yönləndirilməsi ən faydalı addımlardandır. Eyni zamanda, vəsaitlərin banklarda əmanət kimi və ya üzərinə gəlir hesablanan cari hesablarda saxlanılması da effektiv üsullardandır".

X.Məmmədli valyuta seçiminin də vacib məqamlardan biri olduğunu vurğulayıb. Onun sözlərinə görə, manatla olan əmanətlərdə gəlirlilik adətən daha yüksək olsa da, dollar hesablarında faizlər nisbətən aşağı olur:

“Burada artıq vətəndaşlar öz risk seçimlərinə və valyuta risklərinə uyğun qərar verməlidirlər”.

Mütəxəssis vəsaitlərin bir istiqamətdə saxlanılmasının əvəzinə bölüşdürülməsini daha məqsədəuyğun hesab edir:

“İnsanlar vəsaitlərinin müəyyən hissəsini nağd formada saxlaya, bir hissəsini banka yerləşdirə, bir hissəsini biznesə və ya qiymətli kağızlara yatıra bilərlər. Vəsaitin müxtəlif alətlər arasında bölüşdürülməsi risklərin azaldılmasına kömək edir. Bu yanaşma maliyyə dünyasında diversifikasiya adlanır”.

Mələk Ziyad