Macarıstan “Lukoil”in Azərbaycandakı aktivlərini almaq istəyir

Macarıstanın MOL neft-qaz şirkəti ABŞ rəsmilərinə Rusiyanın “Lukoil” şirkətinin xaricdəki aktivlərini almaqda maraqlı olduğunu bildirib.

Bu barədə "Reuters" agentliyi məsələ ilə tanış üç mənbəyə istinadən məlumat yayıb.

Qeyd edilib ki, “Lukoil” hazırda "Exxon Mobil", "Chevron" kimi ABŞ nəhəngləri, həmçinin Yaxın Şərqdən potensial investorlarla danışıqlar aparır.

Mənbələrin məlumatına görə, MOL şirkəti “Lukoil”ə məxsus Avropadakı neftayırma zavodları və yanacaqdoldurma məntəqələrini, həmçinin Azərbaycan və Qazaxıstandakı hasilat layihələrindəki payları almaqda maraqlıdır.

Qeyd edilib ki, Macarıstanın baş naziri Viktor Orban bu məsələni 9 noyabrda Ağ Evdə ABŞ prezidenti Donald Trampla müzakirə edib. Noyabrın sonunda Orban Rusiya prezidenti Vladimir Putinlə də görüşüb və danışıqlardan sonra “məcburi satışlar fonunda iki-üç böyük müqavilə üçün yeni imkanların açıldığını” bildirib.

Qeyd edək ki, ABŞ oktyabrın 22-də “Lukoil”, “Rosneft” və onların 34 törəmə şirkətinə qarşı sanksiyalar tətbiq edib. Bundan sonra “Lukoil” xarici aktivlərinin satışına başlayıb. ABŞ Maliyyə Nazirliyi noyabrda şirkətin beynəlxalq biznesinin satışı ilə bağlı əməliyyatlara 13 dekabradək icazə verən xüsusi lisenziya verib.

©Modern.az