Redaktor
“LinkedIn” profilində süni intellekt ilə maraqlandığını qeyd et
Yeni il “LinkedIn” profilini və ünsiyyət strategiyasını yeniləmək üçün ideal fürsətdir. İş dünyası sürətlə dəyişir və “LinkedIn” artıq sadəcə iş tapmaq platforması deyil. O, şəxsi brendini qurmaq, doğru insanlarla əlaqə yaratmaq və peşəkar olaraq görünür olmaq üçün əsas alətlərdən biridir. Buna görə də “LinkedIn” profilin məqsədlərinə uyğun, aktual və səni araşdıran insanlar üçün cəlbedici olmalıdır.
Müasir dövrdə texnologiya biznesin bütün sahələrinə inteqrasiya olunub. Buna baxmayaraq, səni digərlərindən fərqləndirən əsas cəhət insani keyfiyyətlərindir. “LinkedIn” profilin sənin səmimi, empatik, real təcrübəyə əsaslanan və aydın düşünən biri olduğunu göstərməlidir. Bunlar süni intellektin verə bilmədiyi xüsusiyyətlərdir və insanlarla güclü, mənalı əlaqələr qurmağa kömək edir.
Eyni zamanda süni intellekt demək olar ki, bütün peşələrə təsir göstərir. Ona görə də “LinkedIn” profilində AI ilə maraqlandığını, ondan düşünülmüş şəkildə istifadə etdiyini və bu sahədə bacarıqlarını davamlı inkişaf etdirdiyini vurğulamaq vacibdir. Bu yanaşma işinə məsuliyyətlə yanaşdığını və dəyişən dövrə uyğunlaşdığını göstərir. AI biliklərin iş təsvirində, paylaşdığın kontentdə və istifadə etdiyin alətlərdə öz əksini tapa bilər.
Məqsəd “LinkedIn”də daha çox aktiv olmaq deyil, doğru addımları düzgün atmaqdır.
1. “LinkedIn” profilinin yenilənməsi
Bir il ərzində çox şey dəyişə bilər. Əgər profilini mütəmadi yeniləməmisənsə, onu daha aktual və təsirli hala gətirməyin vaxtıdır.
Profil şəkli
Profil şəkli səni rəqəmsal mühitdə real insana çevirir. İnsanların səninlə emosional əlaqə qurmasına kömək edir. Şəkil səni aydın göstərməli, köhnə olmamalı və real həyatda tanına biləcək qədər aktual olmalıdır. Əgər bu meyarlara cavab verirsə, yeniləməyə ehtiyac yoxdur.
Başlıq
“LinkedIn” başlığı sənin kim olduğunu dərhal anlatmalıdır. Platforma 220 simvol verir və bu sahədən maksimum istifadə etmək lazımdır. Yaxşı bir başlıq üç əsas funksiyanı yerinə yetirir:
Mövcud vəzifən, rolun və çalışdığın sahə ilə səni relevant göstərir.
Axtarış nəticələrində tapılmağın üçün lazımi açar sözləri ehtiva edir.
Səni fərqləndirən cəhətləri göstərərək qarşı tərəfdə maraq yaradır.
Burada niyə bu işi gördüyünü, necə etdiyini və hansı nəticələr əldə etdiyini qısa şəkildə ifadə etmək mümkündür.
“About” (Haqqında) bölməsi
“About” bölməsi sənin şəxsi təqdimatındır. Bu hissə çox vaxt “Google” və “LinkedIn” axtarışlarında ilk qarşılaşılan mətndir. Burada öz hekayəni danışmaq, dəyərlərini, məqsədlərini və peşəkar baxışını bölüşmək olar. Düzgün yazılmış “About” bölməsi səni rəqabətli bazarda fərqləndirir, məqsədlərinə uyğun fürsətləri cəlb edir və insanlar arasında etibar yaradır. AI ilə bağlı düşüncələrini də məhz burada ifadə etmək çox uyğundur.
“Featured” bölməsi
Bir çox istifadəçi bu hissəni boş saxlayır, amma əslində bu, fərqlənmək üçün böyük fürsətdir. “Featured” bölməsi profilin yuxarı hissəsində yerləşir və daha çox diqqət çəkir. Burada:
60 saniyəlik tanıtım videosu
uğur hekayələri və seçilmiş paylaşımlar
özünə məxsus metod, sistem və ya yanaşmalar
yer ala bilər. Bu bölmə profilini daha canlı və vizual baxımdan güclü edir.
2. “LinkedIn”də şəbəkə strategiyasının qurulması
2026-cı ildə effektiv networking kəmiyyətə deyil, keyfiyyətə əsaslanır. “LinkedIn”də 1,3 milyarddan çox istifadəçi olsa da, məqsəd hamısı ilə əlaqə qurmaq deyil. Öz peşəkar icmanı formalaşdırmaq əsasdır.
Yeni il üçün:
Son bir ildə tanış olduğun insanlara bağlantı göndər.
Sahənə uyğun, oxşar düşüncəli mütəxəssislərlə əlaqə yarat.
LinkedIn profilini e-mail imzana və təqdimat materiallarına əlavə edərək daha çox görün.
Bu addımlar əlaqələrinin təbii və davamlı şəkildə böyüməsinə kömək edəcək.
3. Görünürlük və aktivlik planı
Güclü şəxsi brend görünür olmağı tələb edir. “LinkedIn”də təsir yaratmaq üçün paylaşdığın kontent dəyərli olmalıdır. Bunun üçün üç əsas prinsip var:
Daimilik: Bir mövzu və baxış bucağı seç və ona sadiq qal.
Müntəzəmlik: Ayda bir neçə dəfə, həftəlik və ya gündəlik öz ritmini müəyyən et.
Dəyər: Paylaşımların auditoriya üçün faydalı və mənalı olsun.
“LinkedIn”i davamlı vərdişə çevir
“LinkedIn” bir dəfə yenilənib unudulan platforma deyil. Profilini mütəmadi olaraq yeniləmək, şəbəkənlə aktiv ünsiyyətdə olmaq və məqsədlərinə uyğun kontent paylaşmaq “LinkedIn”dən real nəticə almağın əsas şərtidir. “LinkedIn” sənin üçün işləyəcək, əgər sən onun üzərində işləsən.
Şəbnəm İbrahimxəlilova
