Kirayə ödənişlərindən 1,2 milyard qazanan “Bilt Rewards”un qurucusunun biznes hekayəsi

Ankur Jain ABŞ-ın Vaşinqton ştatında, Seattle yaxınlığında yerləşən Bellevue şəhərində 1990-cı ildə anadan olub. Uşaqlıqdan texnologiyaya marağı ilə seçilib və 11 yaşında "MyOnlineQuiz.com" adlı veb-saytı qurub. Daha sonra Wharton Schoolda təhsil alıb və "Tinder"də məhsul üzrə vitse-prezident vəzifəsində çalışıb.

Valyuta.az xəbər verir ki, 2019-cu ildə Ankur tərəfindən yaradılan və 2021-ci ildə fəaliyyətə başlayan “Bilt Rewards”, kirayə və kondo ödənişlərinə görə istifadəçilərə mükafat xalları qazandıran ilk platformadır.

"Bilt" sistemində istifadəçilər istər bank köçürməsi, istərsə də kart vasitəsilə kirayə ödəsələr, mükafat xalları əldə edirlər. Bu ödənişlər kredit bürolarına göndərildiyi üçün istifadəçilərin kredit tarixçələri yaxşılaşır. 2024-cü ildə platforma 36 milyard dollarlıq, 2025-ci ildə isə 50 milyard dollarlıq kirayə ödənişini emal edib.

“Bilt Rewards” həmçinin istifadəçilərin yaşadıqları ərazidəki restoran, aptek və fitnes mərkəzləri kimi yerli bizneslərdə xərcləmə etdikdə xal qazanmasına şərait yaradır. Bu model həm lokal bizneslərə müştəri qazandırır, həm də "Bilt"ə əlavə gəlir gətirir. Bu sistemin 2025-ci ildə 5 milyard dollar həcmində dövriyyə yaratdığı bildirilir.

Platforma “Wells Fargo” ilə əməkdaşlıq çərçivəsində birgə brendli kredit kartı təqdim edir. Bu kart istifadəçilərə rüsum ödəmədən kirayə ödənişi etməyə imkan verir. Bu isə landlordlar üçün əlavə xərc yaratmır. Bununla belə, bank bu əməkdaşlığa görə ayda təxminən 10 milyon dollar zərər edir və şərtlərin yenidən nəzərdən keçirilməsi planlaşdırılır.

2025-ci ilin əvvəlində Bilt “Bakıyan” adlı xərcləmə məlumatlarını təhlil edən platformanı alaraq fəaliyyət sahəsini genişləndirib. Bundan başqa, tələbə kirayələri üzrə pilot layihə Baylor Universitetində həyata keçirilib. Bu layihə tələbələrin həm xal qazanmasına, həm də kredit tarixçəsinin formalaşmasına xidmət edir.

Şirkət eyni zamanda ev krediti ödəmələrinə görə xal qazandırmaq üçün yeni proqram üzərində çalışır. Bu sistem kirayə mükafatları modeli əsasında formalaşdırılaraq daha geniş maliyyə xidmətlərini əhatə etməyi hədəfləyir.

Ankur Jain uğurlu biznes modeli yaratmaq üçün real problemlərin həllinə fokuslanmağın vacibliyini vurğulayır. Onun fikrincə, startaplar insanların gündəlik həyatındakı real çətinlikləri həll etməyə yönəlməlidir. O, sürətlə böyümək əvəzinə, çevik və strukturlaşdırılmamış şəkildə fəaliyyət göstərməyi üstün tutur. Komandasında dərin maraq və öyrənmə həvəsi olan işçilərlə işləməyi seçir və şəxsən istifadəçi rəylərini oxuyur.

2024-cü ildə “Bilt Rewards” şirkəti 3,25 milyard dollar, 2025-ci ildə isə 10,75 milyard dollar dəyərində qiymətləndirilib. Ankur Jainin sərvəti "Forbes" tərəfindən 1,2 milyard dollar olaraq dəyərləndirilir. Şirkətin 2025-ci il üçün 1 milyard dollarlıq illik gəlir hədəfinə çatdığı bildirilir.

Bilt hekayəsi ona görə diqqətəlayiqdir ki, sadə görünən və uzun illər dəyişməyən bir sahədə - kirayə bazarında - köklü innovasiya tətbiq olunub. Kirayə verənlər, istifadəçilər və yerli bizneslər arasında dəyər sinergiyası yaradaraq hər kəsin qazanmasına nail olunub. Ankur Jainin rəhbərliyi ilə "Bilt" yalnız kirayə ilə kifayətlənmir, tələbə borcları və ev krediti sahələrinə keçid edərək daha geniş maliyyə ekosistemi qurur.

Mayya Hüseynova