İlon Maskdan səs-küylü açıqlama - "Süni intellekt hər kəsin işini əlindən alacaq”

"Tesla" və "X" şirkətlərinin sahibi İlon Mask yenidən süni intellekt mövzusunda qalmaqallı açıqlama verib.

Valyuta.az xəbər verir ki, o, gələcəkdə bütün sahələrdə bütün növ işlərin, öz işi də daxil olmaqla, süni intellekt tərəfindən əvəzlənəcəyini bildirib.

Mask bu fikirlərini ChatGPT-nin xərçəngdən sağ qalan birinə necə kömək etdiyini izah edən paylaşıma cavab olaraq səsləndirib. Həmin paylaşımda süni intellektin bəzi hallarda həkimlərdən daha dəqiq qərarlar verə biləcəyi və bunun tibb dünyasında geniş müzakirələrə səbəb olacağı qeyd olunurdu. Mask isə mövzuya qısa və qəti reaksiya verib:

“Süni intellekt artıq çox həkimdən daha yaxşıdır və daha da yaxşı olacaq. Hər peşə risk altındadır".

Sosial şəbəkələrdə açıqlama böyük rezonans doğurub. Bəziləri “İlonun yerini ala biləcək süni intellekti təsəvvür etmək çətindir” fikrini səsləndirsə də, digərləri “Bəs biz nə edəcəyik? Heç nə etmədən maaş alacağıq?” sualı ilə çıxış edib. Mask isə bu suallara cavab verməyib.

Bəzi investorlar bu dəyişikliklərə panikaya qapılmadan hazırlaşmağın vacibliyini vurğulayır. Mark Cuban kimi tanınmış iş adamları insanların süni intellektlə əməkdaşlıq edə biləcək bacarıqlar qazanmasını və maşınların asanlıqla təkrarlaya bilməyəcəyi sosial bacarıqlarını inkişaf etdirməsini tövsiyə edir.

Sərvanə Rəmixanova