Elektrikli skuter şirkəti ümumi investisiyanı 76 milyon dollara çatdırdı

Elektriklə işləyən motosiklet və skuterlərin istehsalçısı olan Hindistan mərkəzli "Ultraviolette" şirkəti 21 milyon dollar investisiya cəlb edib.

Valyuta.az xəbər verir ki, 2016-cı ildə qurulan "Ultraviolette" indiyədək ümumilikdə təxminən 75 milyon dollar sərmayə toplayıb.

Şirkət bildirib ki, yeni vəsait Avropada mövcudluğunu gücləndirmək, Latın Amerikası və Cənub-Şərqi Asiya bazarlarına daxil olmaq və 2027-ci ilin əvvəlinə qədər məhsul çeşidini 14 modelə çatdırmaq məqsədilə istifadə olunacaq.

"Ultraviolette" şirkəti Nayaran Subramaniam və Nirac Racmohan tərəfindən təsis edilib və əsas fəaliyyət sahəsi elektriklə işləyən motosiklet və skuterlərin hazırlanmasıdır. Şirkətin məhsulları arasında "F77 Mach 2", "F77 SuperStreet", yüngül çəkiyə malik "Shock Wave" motosikleti və radar, kamera, zolaq dəyişmə köməkçisi ilə kor zona aşkarlama funksiyalarına malik "Tesseract" skuteri yer alır.

"Ultraviolette" batareya idarəetmə sistemi, mühərrik nəzarət bloku, daxili proqram təminatı və eSIM texnologiyasına əsaslanan ağıllı nəqliyyat texnologiyalarını öz daxilində istehsal edir. Şirkətin istehsal etdiyi nəqliyyat vasitələri öncədən texniki xidmət sistemi ilə təchiz olunub. Bu sistem hətta zəncirin yağlanması kimi kiçik texniki ehtiyacları belə əvvəlcədən müəyyən edə bilir.

Hazırda ildə 30 min nəqliyyat vasitəsi istehsal etmək imkanına malik olan "Ultraviolette", Hindistan üzrə 20 satış məntəqəsinə sahibdir. Şirkət bu sayını ilin sonuna qədər 100-ə çatdırmağı planlaşdırır. Eyni zamanda Avropa, Latın Amerikası, Cənub-Şərqi Asiya, ABŞ və Yaponiya kimi bazarlara daxil olaraq qlobal miqyasda böyüməsini sürətləndirməyi qarşısına məqsəd qoyub.

Mayya Hüseynova