Çin Avropada 1 milyard avroluq günəş paneli layihəsinə başlayır

Çinin özəl “SANY” konqlomeratı Rumıniyanın Timış bölgəsində inşa olunacaq iki günəş parkını əhatə edən enerji layihəsinə 1 milyard avrodan çox sərmayə yatırır. Layihəyə həmçinin enerji yığma sistemi və məlumat emalı mərkəzi də daxildir.

Valyuta.az xəbər verir ki, “Ziare.com” nəşrinin məlumatına görə, Uivar ərazisində ümumi gücü 800 MVt olan iki günəş parkı tikiləcək. Timisoara şəhərində isə 2,34 QVt·saat tutumlu enerji saxlama sistemi və 70 MVt İT yükünə malik məlumat mərkəzi inşa olunacaq.

Günəş parklarına yatırımlar təxminən 320 milyon avro təşkil edir, enerji saxlama sistemi və İT mərkəzi isə hər biri təxminən 350 milyon avroya başa gələcək. Layihənin icrasını Rumıniyanın “Danube Solar Seven SRL” şirkəti təmin edir.

Çinin “SANY” qrupu ağır sənaye texnikası və avadanlıqları istehsalı ilə tanınır. Şirkət layihə üçün əsas avadanlığı, o cümlədən Çinin Hunan əyalətində yerləşən tam robotlaşdırılmış fotovoltaik panel istehsal xəttində hazırlanmış günəş panellərini tədarük edir.

Müxtəlif enerji bazarlarındakı dəyişikliklər nəticəsində Avropada enerji qiymətləri dalğalanma göstərir. Günəş və külək enerjisinin genişlənməsi səbəbindən bəzi ölkələrdə gündüz saatlarında elektrik enerjisinin qiyməti aşağı və ya hətta mənfi olur, axşam saatlarında isə xərclər kəskin artır. Hazırda Almaniya, Fransa və İspaniyada pik günəş saatlarında aşağı və ya mənfi elektrik qiymətləri qeydə alınır. Eyni zamanda axşam saatlarında istehlakçılar elektrik üçün daha yüksək məbləğ ödəyirlər.

Günəş panellərinin adambaşına düşən payına görə dünya lideri Avstraliyadır. Burada ümumi günəş gücü 28,3 GVt təşkil edir və bu il əlavə 5,2 GVt artım gözlənilir.

Paşa Məmmədli