Çin Afrikanın ən böyük yataqlarından birindən 200 min ton filiz aldı

Çin Qvineyadakı Simandou yatağından 200 min ton həcmində dəmir filizinin ilk tam partiyasını qəbul edib. 

Valyutaı.az xəbər verir ki, bu barədə “Business Insider” məlumat yayıb.

“RTM Cartier” adlı gəmi Dalian limanına yan alaraq Afrika qitəsinin tarixində ən böyük dağ-mədən layihəsinin işə salınmasını simvolizə edib.

Mövcud məlumata görə, tədarük Qvineya hökuməti, “Rio Tinto” və Çin tərəfdaşlarının birgə müəssisəsi olan “SimFer” tərəfindən hasil edilən yüksək keyfiyyətli filizdən ibarət olub.

Simandou dəmir filizi hasilatı layihəsinin dəyəri 23 milyard dollar olaraq qiymətləndirilir və bu təşəbbüs Afrikanın tarixində ən böyük dağ-mədən layihəsi hesab olunur.

Layihə “nəsillərin iqtisadi fürsəti” adlandırılır. “Bloomberg”in yazdığına görə, onun həyata keçirilməsi onilliklər boyu davam edən siyasi qeyri-sabitlik, uzunmüddətli məhkəmə çəkişmələri və mülkiyyət hüquqları ilə bağlı kəskin mübahisələrlə müşayiət olunub.

Yataq ilk dəfə 1950-ci illərdə Fransanın müstəmləkə idarəçiliyi dövründə araşdırılıb, lakin onun həqiqi miqyası yalnız 1990-cı illərdə aydınlaşıb. Həmin dövrdə “Rio Tinto” şirkətinin geoloqları böyük həcmdə yüksək keyfiyyətli dəmir filizi ehtiyatlarını rəsmi şəkildə təsdiqləyiblər.

Hazırda əldə edilən filiz artıq Daliandakı ixtisaslaşmış kompleksdə emal olunur.

Pekin üçün bu yatağa çıxış təsadüfi deyil. Bildirilir ki, Çin şirkətləri dəmir yolu və limanlar kimi infrastrukturun maliyyələşdirilməsində əsas rol oynayıb. Bu isə Çinə Avstraliya və Braziliya kimi təchizatçılardan asılılığı azaltmağa imkan verir.

Paşa Məmmədli