"ChatGPT"in istifadəsi ilə ən çox qazanan sektorlar - CƏDVƏL

2022-ci ilin sonunda "ChatGPT"in istifadəyə verilməsi texnologiya sahəsində son onilliklərin ən güclü investisiya dövrlərindən birinə səbəb olub. Sərmayələr süni intellekt infrastrukturundan fayda götürə biləcək şirkətlərə və sahələrə, o cümlədən bulud hesablama və rəqəmsal xidmətlərə yönəlib.

"Deutsche Bank" tərəfindən hazırlanan vizuallaşdırmada 30 noyabr 2022-ci ildə ChatGPT-in debütündən sonra ABŞ-da əsas səhmdar sektorlarının performansı əks etdirilib. Məlumata görə, "Nvidia"nın səhmləri süni intellekt üçün nəzərdə tutulmuş çiplərə tələbin artması nəticəsində 1000%-dən çox bahalaşıb.

Ən yüksək gəlirliliyi təmin edən sektor "kommunikasiya xidmətləri" olub - "Meta"nın təxminən beşqat artımı bu sektora 185%-lik ümumi gəlir qazandırıb. "İnformasiya texnologiyaları" sektoru 157%-lik nəticə ilə ikinci yeri tutub. Bu artıma süni intellektin inkişafında əsas rol oynayan çip istehsalçıları və bulud provayderlərinin performansı təsir göstərib.

"İstehlak malları" sektoru da məhsuldarlığı artıran süni intellekt həllərinin dolayı təsiri ilə yüksək göstəricilər nümayiş etdirib. Bu nəticələr süni intellekt dalğasının yalnız yarımkeçirici sənayesi ilə məhdudlaşmadığını, bir neçə əlaqəli sahəyə də təsir etdiyini göstərir.

Süni intellekt bumundan ən çox yararlananlar yarımkeçirici istehsalçıları olub. "Nvidia" təxminən 1020%-lik gəlirlə ABŞ-ın əsas şirkətləri arasında ən yüksək artıma nail olub. "Broadcom" isə 700%-dən çox bahalaşaraq süni intellekt üçün nəzərdə tutulan sürətləndiricilər və şəbəkə avadanlıqları sahəsindəki üstünlüyünü təsdiqləyib. "Western Digital" və "Meta" da müvafiq olaraq 500%-ə yaxın və ya daha yüksək gəlir əldə ediblər.

Texnologiya sektorundakı yüksəliş fonunda müdafiə xarakterli və faiz dərəcələrinə həssas olan sahələr daha zəif nəticələr göstərib. "Kommunal xidmətlər" sektoru 42%, "səhiyyə" 23%, "istehlak malları" isə cəmi 20% gəlir əldə edib. Sənaye tələbinin zəifləməsi və faiz dərəcələrinin yüksəlməsi "materiallar" sektorunu ən aşağı göstəricilər sırasına salıb. "Enerji" sektoru isə 9%-lik artımla kifayətlənib. Müqayisə üçün, bu dövrdə "S&P 500" indeksi 80% artım nümayiş etdirib.

Mayya Hüseynova