Bahalı görünən keyfiyyətsiz evləri necə tanımaq olar?

Ev seçərkən bir çox insanlar ilk növbədə onun görünüşünə və estetik tərəfinə diqqət yetirirlər. Lakin evin bahalı və cəlbedici görünməsi hər zaman onun keyfiyyətli tikildiyi anlamına gəlmir.

Valyuta.az xəbər verir ki, daşınmaz əmlak investisiyası üzrə mütəxəssis Arzu Rəsulova sosial şəbəkə hesabında keyfiyyətsiz, lakin bahalı görünən evləri müəyyən etməyin yollarını açıqlayıb.

Ekspertin sözlərinə görə, evə baxarkən ilk diqqət yetirilməli yerlərdən biri divarın alt hissəsidir. Əgər divarın dibində ağ duz ləkələri, qabarmış suvaq və ya rütubət izləri görünürsə, bu, hidroizolyasiyanın düzgün aparılmadığını və torpaq rütubətinin divarlara qalxdığını göstərə bilər.

Rəsulova həmçinin fasada diqqət yetirməyi tövsiyə edir. Onun sözlərinə görə, divara uzaqdan baxdıqda fasad dalğalı görünürsə, bu, suvağın düzgün texnologiya ilə çəkilmədiyini göstərir və çox vaxt tikintidə xərcləri azaltmaq üçün tətbiq olunan üsullardan biri olur.

Ekspert qapıların vəziyyətini də yoxlamağı məsləhət görür: "Qapını açıb buraxdıqda o, öz-özünə hərəkət edirsə, bu, divar və ya döşəmənin səviyyəsinin düzgün çıxarılmadığını göstərə bilər".

Pəncərələr də vacib göstəricilərdən biridir: "Əgər pəncərə ətrafında nazik çatlar və boşluqlar varsa, bu, montaj işlərinin zəif aparıldığını göstərir. Belə problemlər sonradan rütubət və istilik itkisi kimi çətinliklər yarada bilər".

A.Rəsulova hamam otağında da bəzi məqamları yoxlamağı tövsiyə edir. Onun sözlərinə görə, kranı açdıqda kanalizasiya səsi çox güclü eşidilirsə, bu, kanalizasiya borularının düzgün quraşdırılmadığını və izolyasiyanın zəif olduğunu göstərə bilər.

Bundan əlavə, suyun yavaş axması kanalizasiya xəttində meylin düzgün verilmədiyinə işarə edə bilər: "Hamamda rütubət və ya kanalizasiya qoxusunun hiss olunması isə adətən ventilyasiya və ya hidroizolyasiya problemlərindən xəbər verir".

Sərvanə Rəmixanova