Azərbaycanda bank kartları metroda ödənişə nə qədər keşbek verir?

Bakı metropolitenində bank kartları ilə edilən ödənişlər zamanı müxtəlif banklar tərəfindən keşbek kampaniyaları təklif olunur. 

Valyuta.az xəbər verir ki, "ABB", "Leobank" və "Kapital Bank" tərəfindən təqdim edilən bu kampaniyalar müştərilərə müəyyən şərtlərlə ödənişlərinin bir hissəsini geri alma imkanı verir.

"ABB"nin Tam DigiCard istifadəçiləri üçün "Apple Pay" və ya "Google Pay" vasitəsilə metroda ödənişdə hər beşinci əməliyyatda 100 faiz keşbek əldə edirlər. Beləliklə, 5-ci, 10-cu, 15-ci və bu ardıcıllıqla davam edən əməliyyatlarda 0.60 manat tam şəkildə geri qaytarılır.

Kampaniya yalnız mobil ödənişlər üçün keçərlidir və hər müştəri maksimum altı dəfə keşbek qazana bilər. Keşbekin hesablanması üçün balansda kifayət qədər vəsait olmalı və əməliyyat uğurla tamamlanmalıdır. Qeyd edək ki, kampaniya 12 dekabr tarixinə qədər davam edəcək. 

"ABB"də həmçinin “Faydalı” keşbek paketi mövcuddur. Bu paket çərçivəsində QR kod vasitəsilə edilən ödənişlərə 2 faiz keşbek hesablanır. Bu imkan “Bayram”, “Macərapərəst”, “Romantik”, “Ailə başçısı” və “Kapitalist” kateqoriyalarına şamil edilir və maksimal keşbek məbləği 30 manatdır.

"Leobank" müştəriləri metro ödənişlərini "Apple Pay" və ya "Google Pay" ilə etdikdə ilk ödəniş üzrə 30 faiz, növbəti səfərlərdə isə 20 faiz keşbek əldə edirlər. Bu mexanizm kampaniya deyil, bankın təqdim etdiyi daimi keşbek proqramı çərçivəsində fəaliyyət göstərir.

"Kapital Bank" müştəriləri isə QR kod vasitəsilə həyata keçirdikləri ödənişlərə görə 3 faiz keşbek əldə edə bilirlər. Bu imkan daimi əsaslarla təqdim olunur və müştərilərə gündəlik ödənişlərdə qənaət imkanı yaradır.

Mayya Hüseynova