Avtoekspertlər bu 6 lüks avtomobili almağa qarşı xəbərdarlıq edirlər

Lüks avtomobil almaq bir çox sürücü üçün yüksək komfort, qabaqcıl texnologiyalar və etibarlı performans deməkdir. Lakin mütəxəssislər xəbərdarlıq edirlər ki, bəzi premium modellər yüksək qiymətlərinə baxmayaraq, sahiblərinə gözləniləndən daha çox problem yarada bilər. Bahalı texniki xidmət, tez-tez baş verən nasazlıqlar və sürətli dəyər itkisi bu avtomobillərin əsas çatışmazlıqları sırasındadır.

Valyuta.az xəbər verir ki, "GOBankingRates" nəşri avtomobil sahəsində fəaliyyət göstərən iki mütəxəssislə danışaraq hazırda alınması tövsiyə olunmayan lüks avtomobillərin siyahısını hazırlayıb.

Siyahının ilk sırasında "Range Rover Sport" yer alır. Mütəxəssislərin sözlərinə görə, model tez-tez hava asqısı, elektron sistemlər və yağ sızmaları ilə bağlı problemlər yaşayır. Ehtiyat hissələrinin və təmir işlərinin yüksək qiyməti isə avtomobil sahiblərinin xərclərini daha da artırır. Servis xidmətlərinin məhdud olması səbəbindən bir çox hallarda sürücülər yalnız rəsmi dilerlərə müraciət etməli olurlar ki, bu da əlavə maliyyə yükü yaradır.

Digər problemli model kimi "BMW 7 Series" göstərilir. Ekspertlər bildirirlər ki, bu avtomobil müasir texnologiyalarla zəngin olsa da, zəmanət müddəti bitdikdən sonra elektron sistemlərdə yaranan nasazlıqların aradan qaldırılması çox baha başa gəlir. Bundan əlavə, tez-tez rast gəlinən texniki problemlər modelin ikinci əl bazarında dəyərinin sürətlə azalmasına səbəb olur.

"Mercedes-Benz CLS" də mütəxəssislərin tövsiyə etmədiyi avtomobillər sırasındadır. 2023-cü ildə istehsalı dayandırılan model cəlbedici dizaynı ilə seçilsə də, asqı və elektrik sistemlərindəki nasazlıqlar səbəbindən sahiblərinə ciddi xərc yaradır. Ekspertlər hesab edirlər ki, model premium qiymətinə uyğun dəyər təqdim etmir.

Siyahıda yer alan digər avtomobil isə "Audi A3"dür. Mütəxəssislərin fikrincə, model komfort və yanacaq qənaəti baxımından qənaətbəxş olsa da, mühərrik gücü sahəsində rəqiblərindən geri qalır. Bu səbəbdən daha münasib qiymətə satılan bəzi avtomobillər performans baxımından onu üstələyə bilir.

Böyük ölçüləri və dəbdəbəli görünüşü ilə tanınan "Cadillac Escalade" da ekspertlərin tənqid etdiyi modellərdən biridir. Mütəxəssislər bildirirlər ki, avtomobilin ölçüləri onun idarə edilməsini çətinləşdirir, yanacaq sərfiyyatı isə yüksək olaraq qalır. Bundan başqa, model sürətli dəyər itkisi ilə seçilir və bir neçə il sonra onu sərfəli qiymətə satmaq çətinləşir.

Siyahını tamamlayan "Genesis GV80" isə həddindən artıq texnoloji imkanlarına görə tənqid olunur. Avtomobil müxtəlif qabaqcıl funksiyalar təklif etsə də, bəzi sürücülər, xüsusilə yaşlı nəsil üçün bu sistemlərin istifadəsi mürəkkəb görünə bilər. Ekspertlər hesab edirlər ki, texnologiyanın həddindən artıq çox olması bəzi hallarda istifadə rahatlığını azalda bilər.

Mütəxəssislərin qənaətinə görə, lüks avtomobil seçərkən yalnız marka nüfuzuna və texnoloji imkanlara deyil, həm də uzunmüddətli istismar xərclərinə, etibarlılıq göstəricilərinə və ikinci əl bazarındakı dəyərinə diqqət yetirmək vacibdir. Bu amillər nəzərə alınmadıqda bahalı avtomobil gözlənilməz maliyyə yükünə çevrilə bilər.

Tənzilə Ağabalayeva