Amerikalı bankir Avropanın əsl problemlərini açıqladı: Zəiflik və bürokratiya...

"Hazırkı zəif Avropa ABŞ üçün ciddi iqtisadi təhlükə yaradır".

Valyuta.az xəbər verir ki, bunu ABŞ-ın ən böyük bankının - "JPMorgan Chase" şirkətinin rəhbəri Ceymi Daymon Reagan National Defense Forum tədbirində çıxışı zamanı deyib.

“Avropanın real problemi var. Onlar biznesi, investisiyaları və innovasiyaları kənarlaşdırıblar. Bu isə artıq bumeranq kimi geri qayıdır”, deyə Daymon qeyd edib.

Onun fikrincə, sosial təminat və avronun tətbiqi kimi uğurlu islahatlara baxmayaraq, hazırda Avropa İttifaqı zəifdir. Çünki Aİ həddindən artıq bürokratlaşdırılıb və daimi siyasi çətinliklər inkişafı ləngidir.

Eyni zamanda, o vurğulayıb ki, gücləndirilməsi vacib olan məhz Avropa İttifaqıdır. Daymon uzun müddətdir ki, parçalanmış Avropanın dünyanın üzləşdiyi əsas çağırışlardan biri olduğunu bildirir.

“Əgər Avropa dağılarsa "Öncə Amerika" artıq mümkün olmayacaq. Bu, bizə başqalarından daha sərt təsir edəcək - onlar bütün parametrlər üzrə, o cümlədən həqiqətən vacib olan ortaq dəyərlər baxımından bizim əsas müttəfiqimizdir”, deyə o izah edib.

Daymon Tramp administrasiyasını bürokratiyanı azaltmağa görə tərifləyib: “Onlar Amerikanı ləngidən tənzimləmələrin üzərinə baltayla gedirlər. Bu, yaxşıdır və biz bunu təhlükəsizliyi qurban vermədən edə bilərik”.

O həmçinin hesab edir ki, ABŞ Avropanın daha güclü olmasına kömək etməlidir. Bunun üçün isə onun fikrincə, uzunmüddətli strategiya hazırlanmalıdır.

Nəşr əlavə edir ki, "JPMorgan" gələn 10 il ərzində ABŞ-ın iqtisadi təhlükəsizliyini gücləndirən sahələrə - müdafiə, enerji müstəqilliyi, qabaqcıl texnologiyalar və tədarük zəncirlərinə 1,5 trln dollara qədər investisiya ayıracağını elan edib. Bank strateji şirkətləri dəstəkləmək üçün əlavə olaraq 10 mlrd dollara qədər öz kapitalından istifadə edəcək.

Paşa Məmmədli