ABŞ-da 2025-ci il üçün yaşamaq üçün ən yaxşı kiçik şəhərlər açıqlanıb

Business Insider nəşrinin yazdığına görə, WalletHub analitik platforması ABŞ-da yaşamaq üçün ən yaxşı kiçik şəhərlərin reytinqini açıqlayıb.

Araşdırma çərçivəsində əhalisi 25 min – 100 min nəfər arasında dəyişən 1 318 şəhər qiymətləndirilib. Nəticədə 19 şəhər bütün kateqoriyalar üzrə ən yüksək – yuxarı faiz qrupuna daxil olub.

Tədqiqatda əsas diqqət əlçatanlıq (affordability) və yaşam keyfiyyəti arasında tarazlığa malik şəhərlərə yönəlib. Mütəxəssislərin fikrincə, böyük şəhərlərin gur həyatından uzaqlaşıb daha sakit, rahat və balanslı mühit axtaran amerikalıların sayı artır.

Qiymətləndirmə meyarları

Əlçatanlıq: yaşayış xərcləri, mənzil qiymətləri, ev sahibliyi faizi, ailə gəlirləri

İqtisadi sağlamlıq: məşğulluq, gəlir artımı, işsizlik səviyyəsi, borclanma və iflas göstəriciləri

Təhsil və sağlamlıq: məzuniyyət göstəriciləri, sığortalı əhali, fiziki aktivlik, məktəb sistemlərinin keyfiyyəti

Yaşam keyfiyyəti və təhlükəsizlik: nəqliyyat vaxtı, iş saatları, ictimai iaşə obyektləri, cinayət və yol qəzası statistikası

2025-ci il üçün ABŞ-da ən yaxşı kiçik şəhərlər

Lancaster, Pensilvaniya

Lancaster ən yüksək yaşam keyfiyyəti göstəricisinə malik şəhər olub və ümumi reytinqdə ölkə üzrə ilk 10-luğa daxil edilib.

Arlington, Massaçusets

Boston yaxınlığında yerləşən şəhər təhsil və sağlamlıq göstəricilərinə görə ikinci yerdədir. Bahalı şəhərlər sırasında olsa da, sosial göstəriciləri yüksəkdir.

Lexington, Massaçusets

ABŞ üzrə ən güclü təhsil sistemi bu şəhərdə qeydə alınıb. Təhlükəsizlik göstəriciləri də yuxarı səviyyədədir.

Saratoga Springs, Nyu-York

Yaşam keyfiyyəti üzrə ikinci yerdə qərarlaşıb və ümumi reytinqdə ölkə üzrə ilk 40 şəhər arasındadır.

Franklin, Tennessi

İqtisadi sağlamlıq və təhlükəsizlik baxımından orta-yuxarı mövqedədir. Ümumi göstəricilər üzrə balanslı şəhər hesab olunur.

Holland, Miçiqan

Yaşam keyfiyyəti yüksək olsa da, təhsil və əlçatanlıq göstəriciləri nisbətən zəifdir.

Milton, Massaçusets

Təhsil və sağlamlıq göstəriciləri yüksəkdir, lakin yaşam keyfiyyəti üzrə ən zəif nəticələrdən birinə malikdir.

Appleton, Viskonsin

Yaşam keyfiyyəti güclü, lakin təhlükəsizlik göstəriciləri digər şəhərlərlə müqayisədə zəifdir.

Brentwood, Tennessi

İqtisadi sağlamlıq və təhlükəsizlik göstəriciləri orta-yüksək səviyyədədir, ümumi performansı stabildir.

Leesburg, Virciniya

Təhsil və sağlamlıq üzrə ən güclü şəhərlərdən biridir, əlçatanlıq baxımından da ön sıralardadır.

Brookfield, Viskonsin

Ən balanslı şəhərlərdən biri hesab olunur. İqtisadiyyat, təhsil və əlçatanlıq göstəriciləri yüksəkdir.

Castle Rock, Kolorado

İqtisadi inkişaf və təhlükəsizlik göstəriciləri güclüdür, yaşam keyfiyyəti orta səviyyədədir.

Lehi, Yuta

ABŞ üzrə ən güclü iqtisadiyyata malik şəhərlərdən biridir. Təhlükəsizlik yüksək, yaşam keyfiyyəti isə zəifdir.

Noblesville, İndiana

Təhsil və təhlükəsizlik üzrə ön sıralardadır, əlçatanlıq orta səviyyədədir.

Carmel, İndiana

Təhsil, təhlükəsizlik və əlçatanlıq baxımından ən stabil şəhərlərdən biri hesab olunur.

Kaysville, Yuta

Reytinqdə ən təhlükəsiz şəhərdir, lakin yaşam keyfiyyəti göstəricisi zəifdir.

Fishers, İndiana

Əlçatanlıq və təhsil baxımından güclüdür, təhlükəsizlik də əsas üstünlüklər sırasındadır.

Westfield, İndiana

Əlçatanlıq və iqtisadi inkişaf üzrə ön sıradadır, lakin yaşam keyfiyyəti zəifdir.

Apex, Şimali Karolina

ABŞ üzrə ən güclü iqtisadi sağlamlıq göstəricisinə və top-19 şəhər arasında ən yaxşı əlçatanlığa malikdir. Təhlükəsizlik və təhsil göstəriciləri isə orta səviyyədədir.

Tənzilə Ağabalayeva