Avropada turistləri sürətlə cəlb edən üç autsayder ölkə

İtaliya və ya İspaniya kimi məşhur turizm ölkələrinin həddindən artıq turizmlə fəal mübarizə apardığı bir vaxtda, digər istiqamətlər ön plana çıxaraq getdikcə daha çox turist cəlb edir.

Valuta.az xəbər verir ki, “Travel Off Path” turizm nəşrinin ekspertləri 2026-cı ildə Avropada turizm baxımından sürətlə inkişaf edəcək üç ölkəni müəyyənləşdiriblər.

“Əgər siz daş döşənmiş küçələr, nağılvari qəsrlər və yerli, təbii məhsullardan hazırlanmış dadlı yeməklər arzulayırsınızsa, Avropa yəqin ki, 2026-cı il üçün səyahət siyahınızda ilk yerdədir. Ancaq Fransa və ya İtaliyaya bilet bron etməzdən əvvəl bizi dinləyin: turizm xəritəsi dəyişir. Adi populyar məkanlar turist izdihamında itib-batdığı halda, üç autsayder ölkə səssizcə diqqəti özünə çəkir”, deyə materialın müəllifləri qeyd edirlər.

Yeni məlumatlara əsasən, məhz bu üç istiqamət hazırda Avropada ən sürətlə böyüyən turizm bazarlarıdır və turist axını 21 faizə qədər artıb.

Litva

Rəsmi məlumatlara görə, Litva cüzi fərqlə Avropada ən sürətlə inkişaf edən turizm istiqamətidir. Bu il ölkəyə xarici turistlərin marağı 21% artıb.

Litvaya uçan turistlər çox güman ki, UNESCO tərəfindən qorunan orta əsr paytaxtı Vilnüsə enirlər. Burada daş döşənmiş küçələr və hippilər məhəlləsi kimi tanınan Užupis yerləşir. Özünü sənətçilər respublikası elan edən bu ərazi özünəməxsus mənəvi qaydaları ilə seçilir. Məsələn, "hər kəs pişiyi sevmək və ona qayğı göstərmək hüququna malikdir”, yaxud “itin it olmaq hüququ var”.

Litvanın kompakt ölçülərini nəzərə alsaq, turistlər asanlıqla dəniz limanı Klaipedaya və ya Trakay qala-adəsinə də səfər edə bilirlər.

Şimali Makedoniya

Dənizə çıxışı olmayan bu Balkan ölkəsi tez-tez Albaniya və Xorvatiya kimi daha dəbli qonşuların kölgəsində qalır. Lakin Şimali Makedoniya kristal təmiz gölləri, qədim şəhərləri və gözəl təbiəti ilə seçilir.

Keçən illə müqayisədə turist sayının 20,6% artması bu ölkəni Avropanın ən populyar yay istiqamətlərindən birinə çevirir. Bu marağın böyük hissəsi göl kənarı çimərlikləri və çoxsaylı Bizans abidələri ilə tanınan rahat kurort şəhəri Ohridlə bağlıdır.

Finlandiya

Ümumdünya Turizm Təşkilatının məlumatına görə, Avropada turizm artım tempinə görə üçüncü yerdə hazırda Finlandiya qərarlaşıb. Ölkədə ziyarətçi sayı illik hesabla 17% artıb.

Qış saunaları, möhtəşəm qar mənzərələri və canlı şəhər turları ilə tanınan Finlandiya hazırda açıq şəkildə trenddədir.

Paşa Məmmədli