Mağazalarda "MacBook"lar niyə 76 dərəcə bucaqla yerləşdirilir?

Apple mağazalarında "MacBook" və digər noutbukların ekranlarının müəyyən bir bucaq altında açıq vəziyyətdə nümayiş etdirilməsi təsadüfi deyil. Bu yanaşma təkcə estetik görüntü üçün deyil, eyni zamanda müştəri davranışları və alış qərarına təsir edən psixoloji mexanizmlərlə əlaqələndirilir.

Valyuta.az xəbər verir ki, "Apple" mağazalarında "MacBook" ekranları təxminən 70-76 dərəcə bucaq altında açılır. Bu bucaq mağaza işçiləri tərəfindən hər səhər dəqiqliklə tənzimlənir.

Apple bu prosesi əvvəlcədən müəyyən edilmiş prosedur olaraq tətbiq edir və bu, texniki personal üçün gündəlik rutinin bir hissəsidir.

Ekranın bu şəkildə yerləşdirilməsinin əsas məqsədi müştərini məhsulla fiziki təmasa təşviq etməkdir. Bu bucaq, optimal baxış bucağından azacıq fərqləndiyi üçün, ziyarətçi ekranı öz baxış bucağına uyğunlaşdırmaq ehtiyacı hiss edir. Bu hərəkət nəticəsində alıcı ilə məhsul arasında ilkin fiziki təmas yaranır və bu da psixoloji olaraq məhsulun “özününküləşdirilməsi” hissini gücləndirir.

Tədqiqatlara əsasən, məhsula toxunmaq və onun üzərində dəyişiklik etmək insanların o məhsula daha çox sahiblənmə hissi ilə yanaşmasına səbəb olur. Bu fenomen psixologiyada "sahiblik effekti" (Endowment Effect) kimi tanınır və alış qərarına birbaşa təsir edir.

"Apple" mağazalarında sərgilənən cihazlar eyni zamanda internetə qoşulu və tam funksional vəziyyətdə olur. Bu da ziyarətçilərə məhsulu daha dərindən sınaqdan keçirməyə, tətbiqləri işlətməyə və ümumi istifadə təcrübəsini hiss etməyə imkan verir. Belə yanaşma məhsulun yalnız fiziki deyil, həm də funksional baxımdan tanıdılmasına şərait yaradır.

Beynəlxalq texnologiya portalları və marketinq mütəxəssisləri bu yanaşmanı uğurlu satış strategiyası kimi qiymətləndirirlər. Mövcud məlumatlar göstərir ki, bu detala qədər düşünülmüş yanaşma "Apple"ın məhsul təqdimatında psixoloji davranış modellərindən istifadə etdiyini və klassik sərgi prinsiplərindən fərqli olaraq daha immersiv alış mühiti yaratdığını sübut edir.

Mayya Hüseynova