Özünü məhv edən SSD: üzərində "özünü yox et" düyməsi var

SSD-də saxlanılan kritik məlumatların yad əllərə keçməməsi üçün praktik bir həllmi axtarırsınız? O halda üzərində fiziki "özünü məhv etmə düyməsi" olan bu yeni SSD modeli sizin üçün hazırlanıb.

Valyuta.az xəbər verir ki, Tayvan mənşəli aparat istehsalçısı olan "Team Group", PCIe Gen4 NVMe standartında yeni bir SSD təqdim edib. "P250Q" adlandırılan bu modelin ən diqqətçəkən xüsusiyyəti onun üzərində yerləşən fiziki "özünü yox et" düyməsi vasitəsilə istifadəçi məlumatlarını ya tamamilə silə, ya da fiziki olaraq məhv edə bilməsidir.

Məhsul, xüsusilə hərbi, korporativ və yüksək təhlükəsizlik tələb edən sahələr üçün nəzərdə tutulub.

İki mərhələli təhlükəsizlik mexanizmi

SSD-nin bu təhlükəsizlik funksiyası iki rejimdə işləyir:

* Birinci rejimdə, düyməyə 5 ilə 10 saniyə arası basıldıqda proqram təminatına əsaslanan silinmə prosesi işə düşür. Bu, SSD-dəki bütün istifadəçi məlumatlarını silir, lakin qurğuya zərər vermir. Nəticədə SSD sonradan yenidən istifadə oluna bilər.

* İkinci rejimdə, düyməyə 10 saniyədən çox basıldıqda fiziki özünü məhv mexanizmi aktivləşir. Bu proses zamanı SSD-yə yüksək gərginlik tətbiq olunur və NAND yaddaş çipləri fiziki olaraq sıradan çıxarılır. Bu halda məlumatların bərpası tamamilə mümkünsüz hala gəlir.

"Team Group"un təqdimat videosunda bu məhv prosesi zamanı SSD-dən tüstü çıxdığı belə müşahidə olunur.

İstiyə davamlı texnologiyaya ABŞ patenti

"P250Q" modelinin təqdimatı ilə yanaşı, şirkət geniş temperatur aralığında işləyə bilən M.2 SSD texnologiyası üçün "US 12283335 B2" nömrəli ABŞ patentini də əldə etdiyini açıqlayıb. Bu patent çərçivəsində cihazın 85°C ilə 105°C arasındakı mühit temperaturlarında belə sürət itkisiz sabit şəkildə işləyə bildiyi və üç termal zonada məlumat ötürmə sürətini avtomatik tənzimləyə bildiyi vurğulanır.

Yəni yaxın gələcəkdə kompüterlərdə yüksək temperatura daha dözümlü avadanlıq komponentlərinin istifadəsi genişlənə bilər. Lakin o vaxta qədər, kompüterinizi həddindən artıq istilikdən qorumağa davam etməyiniz tövsiyə olunur.

Paşa Məmmədli