Böyük Britaniyada aparılan yeni bir sorğuya əsasən, 16-21 yaş arası gənclərin yarıya yaxını internetsiz bir dünyada yaşamağa üstünlük verir.

Valyuta.az xəbər verir ki, bu nəticə internetin və xüsusilə də sosial medianın onların psixoloji vəziyyətinə mənfi təsiri ilə izah olunur.

“British Standards Institution” tərəfindən aparılan araşdırma göstərib ki, iştirakçıların təxminən 70 faizi sosial mediada vaxt keçirdikdən sonra özlərini daha pis hiss etdiklərini bildiriblər. Bu, gənclər arasında internetin yaratdığı mənfi özünüdəyərləndirmə meylini və rəqəmsal həyatdan uzaq qalmaq istəklərini artırır. Sorğuda iştirak edənlərin 46 faizi internetsiz bir dünyada gənc olmağı üstün tutduqlarını deyiblər.

Sosial media istifadəsi və yalan davranışlar

Sorğu zamanı məlum olub ki, gənclərin dörddə biri hər gün sosial şəbəkələrdə dörd və ya daha çox saat vaxt keçirir. Həmçinin, iştirakçıların 42 faizi internetdəki fəaliyyətləri barədə valideynlərinə yalan danışdıqlarını etiraf ediblər. Bu nəticələr fonunda Birləşmiş Krallıq hökuməti gənclər arasında sosial media istifadəsinin tənzimlənməsi istiqamətində addımlar atmağı planlaşdırıb. Texnologiya naziri Piter Kayl yaxın zamanda bəzi tətbiqlər, o cümlədən “TikTok” və “İnstagram” üçün məcburi "rəqəmsal fasilə saatlarının" tətbiq edilə biləcəyini istisna etməyib.

Təhlükəsizlik ekspertlərindən xəbərdarlıq

Bununla belə, ekspertlər sadəcə vaxt məhdudiyyətlərinin yetərli olmayacağını bildirirlər. NSPCC-nin (Uşaqların Qorunması üzrə Milli Cəmiyyət) rəqəmsal təhlükəsizlik üzrə siyasət meneceri Rani Govender hesab edir ki, “rəqəmsal komendant saatı” faydalı ola bilər, lakin bu, uşaqları onlayn risklərdən tam qorumaq üçün kifayət deyil. Onun sözlərinə görə, gənclər digər vaxtlarda da eyni təhlükələrlə üz-üzə qalacaqlar və bu risklərin yaratdığı təsir dəyişməyəcək. Govender şirkətləri və hökuməti daha təhlükəsiz və az asılılıq yaradan onlayn platformalar yaratmağa çağırıb.

Sərvanə Rəmixanova