Yaponiyada evlərdə internet ultra-sürətli olacaq

Yaponiyanın telekommunikasiya nəhəngi NTT East Tokio sakinləri üçün ultra-sürətli ev interneti xidmətini istifadəyə verməyə hazırlaşır.

Valyuta.az xəbər verir ki, şirkət mart 2026-cı ildən etibarən “Flet Hikari 25G” adlı yeni tarif paketi ilə 25 Gbps-ə qədər sürət təklif edəcək. Hazırda ölkədə orta istehlakçı üçün maksimum sürət 10 Gbps ilə məhdudlaşır.

Yeni xidmət fiber-to-the-home (FTTH) texnologiyasına əsaslanacaq və “best-effort” prinsipi ilə – mövcud şəbəkə şəraitindən asılı olaraq maksimum əldə edilə bilən sürətlə işləyəcək. Bu addım NTT East-in növbəti nəsil rəqəmsal infrastruktur strategiyası çərçivəsində həyata keçirilir.

Qeyd edək ki, Yaponiya hazırda internet və məlumat ötürülməsi üzrə elmi tədqiqatlarda da ön sıralardadır. Ölkə laboratoriyalarında yaxınlarda aparılan sınaqlarda 1 petabit/saniyə (bir milyon gigabitdən çox) sürətlə məlumat ötürülməsi qeydə alınıb.