İKZF xətti ilə verilən kreditlərin həcmi azalıb, istiqraz buraxılışı isə artıb

Bu ilin yanvar-oktyabr aylarında İpoteka və Kredit Zəmanət Fondu (İKZF) vasitəsilə ümumilikdə 393.3 milyon manat məbləğində kredit verilib.

Valyuta.az Mərkəzi Banka istinadən xəbər verir ki, bu göstərici ötən ilin eyni dövrü ilə müqayisədə 2.8 milyon manat və ya 0.7 faiz azdır.

Hesabat dövründə fond tərəfindən yenidən maliyyələşdirilən kreditlərin həcmi 399.4 milyon manat təşkil edib ki, bu da illik müqayisədə 19.5 milyon manat və ya 4.7 faiz azalma deməkdir.

Eyni zamanda, fondun müvafiq bazarlarda yerləşdirdiyi istiqrazların həcmi 50 milyon manat və ya 10 faiz artaraq 550 milyon manata çatıb.

Bundan əlavə, dövlət büdcəsindən İKZF-yə ayrılan vəsaitin həcmi hesabat dövründə 2.5 milyon manat və ya 2.8 faiz azalaraq 85.2 milyon manat səviyyəsində olub.

©Oxu.az