Soltan Bayramov: Bugünkü peşələrin səriştəlilik tələblərinin 40%-i modifikasiyaya uğrayacaq

2030-cu ildə bugünkü peşələrin səriştəlilik tələblərinin 40%-i modifikasiyaya uğrayacaq.

Valyuta.az "APA-Economics"-ə istinadən xəbər verir ki, bunu İqtisadiyyat Nazirliyinin tabeliyində Dördüncü Sənaye İnqilabının Təhlili və Koordinasiya Mərkəzinin (4SİM) icraçı direktorunun müavini Soltan Bayramov “4Sİ Akademiyası - Milli Proqram”ın yarım illik nəticələrinə dair təqdimatda bildirib.

O qeyd edib ki, insan kapitalının inkişafı Azərbaycanda dövlət siyasətinin önəmli tərkib hissəsini təşkil edir:

“Əgər biz 2030-cu il Azərbaycanın 5 milli prioritetinə diqqət yetirsək, onlardan biri məhz rəqabətli insan kapitalının hazırlanması və müasir innovasiyalar mərkəzinə çevrilməklə bağlı qoyulan bir məqsəddir. Bu məqsədə xidmət edərək, Dünya İqtisadi Forumunun bir neçə təşəbbüsünü Azərbaycana gətirmişik. Bunlardan biri, Skills Accelerator, bacarıqların sürətləndirməsi platformasıdır. Bu platforma dövlət özəl tərəfdaşların, maraqlı tərəflərin həm dialoqunu təmin edir, həmçinin 50-dən çox tərəfdaşın iştirakı ilə cari vəziyyəti təhlil etmək üçün sorğular, təhlillər həyata keçirir. Bu təhlillər nəticəsində, beynəlxalq metodologiya əsasında yenə də Dünya İqtisadi Forumunun dəstəyi ilə bizə təqdim olunacaq metodologiya əsasında yol xəritəsi hazırlanacaq ki, bu yol xəritəsində də həm dövlət qurumlarının, həm də özəl sektor oyunçularının hər birinin özünə məxsus rolu olacaqdır".

O deyib ki, “4Sİ Akademiyası - Milli Proqram”ı üzrə ötən dövr ərzində nəzərə çarpacaq nəticəkər əldə olunub: "2024-cü ilin məlumatlarına baxsaq, onda şahid olacağıq ki, bir istifadəçimiz 6 həftə ərzində ortalama 3 saat öyrənməyə zaman keçiribsə, bu gün, bu, təxminən 9 saata bərabərdir. O deməkdir ki, istifadəçilərimiz 3 dəfə artıq daha çox vaxt keçirir”.