Şirkət 8 milyard qiymətləndirmə ilə 330 milyon dollar investisiya alıb

Avstraliya mənşəli “Airwallex” şirkəti 330 milyon dollarlıq G seriyası sərmayə turunu yekunlaşdırıb. Bu mərhələyə “Addition” investisiya şirkəti rəhbərlik edib.

Valyuta.az xəbər verir ki, sərhədlərarası gəlir idarəçiliyinə fokuslanan “Airwallex” daha əvvəl, 2021-ci ilin martında 100 milyon dollar sərmayə cəlb etmişdi.

Son sərmayə turunda “T. Rowe Price”, “Activant”, “Lingotto”, “Robinhood Ventures” və “TIAA Ventures” kimi investorlar da iştirak ediblər.

2015-ci ildə təsis edilən şirkətin bazar dəyəri 8 milyard dollara yüksəlib. Yeni cəlb edilən vəsait ABŞ bazarında fiziki genişlənmə, insan resurslarına sərmayə və süni intellekt əsaslı məhsulların inkişafı məqsədilə istifadə olunacaq.

“Airwallex” beynəlxalq pul köçürmələri, çoxvalyutalı hesablar, qlobal ödəniş qəbulu, fakturalaşdırma, korporativ kartlar və xərc idarəçiliyi kimi funksiyaları ənənəvi banklarla müqayisədə daha sürətli və çevik texnoloji infrastruktur üzərindən təqdim edir. Şirkətin hazırladığı sistemlər sayəsində müəssisələr fərqli ölkələrdə fiziki varlıq yaratmadan yerli bank hesablarına bənzər hesablar aça, valyuta xərclərini azaldaraq nağd pul axınını optimallaşdıra bilirlər.

“Airwallex”in təsisçiləri Cek Can, Yakob Day, Ki-Lok Vonq, Lüsi Yuetin Lyu və Maks Li olub.

Şirkət son dövrlərdə maliyyə şöbələrinin avtonomlaşdırılmasına xüsusi diqqət yetirir. Süni intellekt texnologiyası əsasında hazırlanmış agentlər xərc nəzarəti, siyasət idarəçiliyi və mühasibatlıq axınları da daxil olmaqla onlarla prosesi avtomatik şəkildə yerinə yetirməklə, maliyyə əməliyyatlarının daha sürətli və səhvsiz idarəsini hədəfləyir.

“Airwallex” texnologiyasını modern bizneslərin bütün qlobal maliyyə əməliyyatlarını vahid platforma üzərindən idarə etməsi üçün təkmilləşdirir.

Mayya Hüseynova