Dünyada milyarderlərin sayı rekorda çatıb - artımın səbəbləri açıqlandı

İsveçrənin “UBS” bankının yeni hesabatına əsasən, dünyada milyarderlərin sayı 2 919 nəfərə çatıb.

Valyuta.az xəbər berir ki, bu, ötən illə müqayisədə 8,8% artım deməkdir.

Hazırda milyarderlərin ümumi sərvəti təxminən 15,8 trilyon dollar təşkil edir. Ümumi sərvət bir il ərzində təxminən 13% artıb ki, bu da həm yeni milyarderlərin meydana çıxması, həm də mövcud milyarderlərin var-dövlətinin artması ilə əlaqələndirilir.

2025-ci ildə siyahıya 287 yeni milyarder əlavə olunub. Onların təxminən 70%-i sərvətini şəxsi təşəbbüsləri nəticəsində əldə edib. 91 nəfər isə sərvətini miras yolu ilə qazanıb. Onların arasında Almaniyadakı tanınmış əczaçılıq ailələrinin nümayəndələri də var. Hesabatda qeyd olunur ki, növbəti 15 il ərzində təxminən 5,9 trilyon dollar dəyərində sərvətin varislərə ötürüləcəyi proqnozlaşdırılır.

Milyarderlərin say və sərvət artımına təsir edən əsas amillərdən biri texnologiya sektorudur. Süni intellekt sahəsindəki inkişaf və bu texnologiyalarla bağlı səhmlərin bahalaşması milyarderlərin sərvətinə əhəmiyyətli dərəcədə təsir edib. “Nvidia”, “Meta” və “Oracle” kimi şirkətlərin səhmlərinin qiymətindəki artım nəticəsində bu sahədə fəaliyyət göstərən milyarderlər böyük gəlir əldə ediblər.

ABŞ texnoloji şirkətlərindən ibarət “Möhtəşəm yeddi” qrupu - “Nvidia”, “Amazon”, “Apple”, “Meta”, “Microsoft”, “Google” və “Tesla” - 2025-ci ildə ümumilikdə 25%-lik səhm artımı ilə seçilib. Bu artım “Oracle”un qurucusu Lari Ellison və “Nvidia”nın baş direktoru Censen Xuana böyük qazanc gətirib. Ellison hazırda 274 milyard dollarlıq sərvəti ilə dünyanın ikinci ən varlı şəxsidir. Onun sərvəti il ərzində 104 milyard dollar artıb. Censen Xuan isə 159 milyard dollarlıq sərvətlə siyahıda doqquzuncu yerdə qərarlaşıb. Onun sərvəti son bir ildə 45 milyard dollar yüksəlib.

ABŞ milyarderlərin sayına görə liderliyini qoruyur. Hazırda bu ölkədə 924 milyarder yaşayır ki, bu da dünyadakı ümumi milyarderlərin təxminən üçdə birinə bərabərdir. 2025-ci ildə ABŞ-da 87 yeni self-made milyarder siyahıya daxil olub. Onların sırasında genetika və biotexnologiya sahəsində fəaliyyət göstərən “Colossal” şirkətinin həmtəsisçisi Ben Lamm və infrastruktur sərmayə firması “Stonepeak”in rəhbəri Maykl Dorrell də yer alır.

Hesabatda həmçinin vurğulanır ki, dünyadakı milyarderlərin 75%-i texnologiya və süni intellekti gənc nəsillər üçün əsas çağırışlardan biri kimi qiymətləndirir. Onlardan biri “UBS”ə açıqlamasında bildirib:
“Süni intellekti həm böyük fürsət, həm də çətinlik kimi görürəm. Sual budur ki, texnologiyanın cəmiyyətə xidmət etməsini necə təmin edək? İnsan təmasını - xüsusilə qonaqpərvərlik və gündəlik həyat kimi sahələrdə - texnologiya ilə necə əvəzləməyək?”

Mayya Hüseynova