Ən gənc milyarder uğurun sirrini açıqladı

"Mercor" şirkətinin 22 yaşlı təsisçisi Brendan Fudi dünyanın ən gənc milyarderləri siyahısına daxil olub və bununla da Z nəslinin işə münasibəti ilə bağlı yayılmış fikirləri təkzib edib.

Valyuta.az "Fortune" nəşrinə əsasən xəbər verir ki, Fudi və məktəb yoldaşları "Mercor" platformasının əsasını Braziliyanın San-Paulu şəhərində keçirilən hakatonda qoyublar.

Onların məqsədi süni intellekt vasitəsilə işə qəbul prosesinin avtomatlaşdırılması olub. Hazırda platforma müraciətləri analiz edir, namizədləri seçir və ilkin müsahibələri həyata keçirir.

Layihə çox qısa müddətdə inkişaf edib: təsisçilər cəmi doqquz ay ərzində ideyanı əvvəlcə milyon dollarlıq dövriyyəsi olan biznesə, daha sonra isə 10 milyard dollar dəyərində startapa çeviriblər.

Uğura fokuslanmaq üçün Fudi Corctaun Universitetindəki təhsilini yarımçıq qoyub və bütün vaxtını "Mercor"a sərf edib. O bildirib ki, fasiləsiz çalışma vərdişi nəticədə onu milyarder statusuna gətirən əsas amillərdən biri olub.

"Mən istirahət günü götürə bilmirəm. İstər-istəməz yenidən işə qayıtmaq istəyirəm. Əsas məsələ həyatını həsr edə biləcəyin bir işi tapmaqdır", - deyə o qeyd edib.

"Fortune" yazır ki, "Mercor"un üç təsisçisi milyarder statusuna Mark Zuckerbergdən daha gənc yaşda nail olublar.

Mayya Hüseynova