“Ayın işçisi” anlayışını dəyişin

İşçi məhsuldarlığı hər bir şirkətin uğurunun əsas göstəricisidir. İnsan resursları düzgün idarə olunmadıqda, nə qədər güclü strategiyalar qurulsa da, şirkət istənilən nəticəni əldə edə bilmir. Əməkdaşları daim motivasiyada saxlamaq isə rəhbərlik üçün ən çətin vəzifələrdən biridir.

Müasir iş mühitində məhsuldarlığı artırmaq üçün təkcə maaş və bonuslar kifayət etmir. İşçilərin motivasiyasını gücləndirmək, mühitini dəyişmək və fərdi yanaşma tətbiq etmək vacibdir. 

Valyuta.az işçi məhsuldarlığını artırmağın 5 fərqli və effektiv yolunu təqdim edir:

1. Mükafat sisteminə yenilik gətirin

Əməkdaşların gördükləri işin dəyərləndirilməsi motivasiyanın əsas qaynaqlarındandır. Amma eyni növ hədiyyələr və təkrarlanan kampaniyalar artıq maraq doğurmaya bilər. Rəhbərlik vaxtaşırı mükafat mexanizmini dəyişməli, bütün işçilərin iştirak edə biləcəyi ədalətli sistem yaratmalıdır. Məsələn, şirkət daxilində püşkatmalar (raffle) keçirmək və qaliblərə kiçik məişət texnikası, hədiyyə kartı və ya elektronika təqdim etmək olar.

2. Pulsuz yemək günləri – sadə, amma təsirli motivasiya

Yemək insanları bir araya gətirən ən güclü sosial vasitədir. Şirkət daxilində mütəmadi olaraq nahar və ya qəlyanaltı günləri təşkil etmək həm komanda ruhunu gücləndirir, həm də əməkdaşların məmnunluğunu artırır. Bunun üçün böyük büdcə tələb olunmur – bəzən sadəcə birgə kofe fasiləsi belə pozitiv enerji yaradır. Əgər imkan varsa, komanda ilə birlikdə axşam yeməyi və ya nahar təşkil etmək də çox effektlidir. Restoranların qrup endirimlərindən yararlanmaqla həm büdcəyə qənaət, həm də işçilərə jest etmək mümkündür.

3. “Ayın işçisi” anlayışını dəyişin

Bir çox şirkətdə “Ayın işçisi” adətən eyni şəxsə təqdim olunur. Bu isə digərlərinin motivasiyasını azalda bilər. Ən yaxşı çıxış yolu – bu təcrübəni “Ayın əməkdaşları” formatına çevirməkdir. Mükafat 2–5 nəfərə təqdim oluna bilər. Beləliklə, həm daha çox insan dəyərləndiriləcək, həm də ədalət hissi güclənəcək. Sertifikatla yanaşı, kiçik hədiyyələr və ya hədiyyə kartları əlavə etmək də motivasiyanı artırır. 

4. Müntəzəm fərdi görüşlər keçirin
Rəhbər ilə işçi arasında açıq və səmimi ünsiyyət məhsuldarlığın əsas açarlarından biridir. Mütəmadi fərdi görüşlər zamanı əməkdaşların fikirlərini, çətinliklərini və təkliflərini dinləmək rəhbərliyə real vəziyyəti anlamağa kömək edir. Hər gün olmasa da, həftəlik və ya iki həftədən bir keçirilən bu görüşlər şirkət daxili mühiti gücləndirir. 

5. Ofis mühitini yeniləyin

Tədqiqatlar göstərir ki, rahat və estetik mühitdə işləyən əməkdaşlar daha yaradıcı və diqqətlidirlər. Ofisin havasını dəyişmək üçün bəzən sadəcə divarların rəngini yeniləmək belə kifayətdir. Yeni masalar, rahat oturacaqlar və ya düzgün işıqlandırma sistemi məhsuldarlığa birbaşa təsir göstərir. Bununla belə, tez-tez təmir aparmaq lazım deyil – hər 6 və ya 12 aydan bir kiçik dəyişikliklər kifayət edir.
Ən gözəl tərəfi isə – əməkdaşların fikrini də soruşun. Onların ofisin dizaynına dair təklifləri həm aidiyyət hissini artırar, həm də şirkət mədəniyyətini gücləndirər.

Tənzilə Ağabalayeva