Bizneslər üçün gəlirli aylar - Hansı aylarda daha çox qazanırlar?

Biznes dünyasında satışların və gəlirlərin dəyişkənliyi aylar üzrə fərqli ola bilər. Müəyyən dövrlərdə mövsümi tələblər, bayramlar və ya xüsusi kampaniyalar gəlirlərin artmasına səbəb olur. Və ya bu əksinə də ola bilər. Hansısa aylarda işlərin zəifliyi, müştərilərin azlığı müşahidə oluna bilər. 

Bəs bizneslərdə hansı aylar daha gəlirli hesab olunur? Hansı ayın gəlirli olduğunu necə müəyyən etmək olar?

Valyuta.az-a danışan "SAT Group” şirkətinin həmtəsisçisi, satış təlimçisi Azad Qəhrəmanov deyir ki, bizneslərdə mövsümiliyin olması təbii haldır və biznesin idarə olunmasında baxılmalı ən vacib amillərdən biridir:

“Hər bir biznesdə demək olar ki, mövsümi dəyişikliklər olur. Fərqli mövsümlərdə, aylarda, hətta həftənin günlərində, günün fərqli saatlarında belə müştərilərimiz olan şəxslərin və şirkətlərin aktivlik səviyyəsi dəyişir. Məsələn, turizm sektorunda müştərilər yay aylarında daha aktiv olurlar. Təhsil sektorunda isə müştərilər yay aylarında passiv, payız, qış, yaz aylarında aktivdirlər. Elə bizneslər var ki, onların müştəriləri həftə içi, elələri də var ki, həftə sonu daha çox olur”.

Təlimçinin sözlərinə görə, istənilən şirkət öz bazarındakı mövsümi dinamikanı müəyyən etməlidir: “Müştərinin davranışlarını analiz etməli və müştərisinin hansı mövsümlərdə daha aktiv olduğunu bilməlidir. Şirkətlər öz fəaliyyətini müştəri davranışlarına əsasən qurmalıdır. İlk növbədə müştərinin aktiv olduğu dövrdə biznes də aktiv olmalıdır ki, müştərilərin çox pul xərcləyəcəyi zamanda həmin pul kütləsindən daha çoxunu əldə edə bilsin. Yəni, həmin aktiv dövrlərdə biznes də öncədən hazırlaşmalı, təklifləri, kampaniyaları və s. məhsulları ilə aktiv olmalıdır. Ən sonuncu məsələ isə mövsüm olmayan dövlərdə xərclərin azaldılması və ya müştərilərin aktiv saxlanması kimi məsələləri diqqətdə saxlamaq lazımdır”.

Rəqəmsal marketinq və biznesin inkişafı üzrə menecer Rəqsanə Məmmədova Azərbaycanda əksər bizneslər üçün xüsusilə gəlirli ayların mart və dekabr olduğunu bilirdi: “Mart ayı 8 Mart Beynəlxalq Qadınlar Günü və Novruz bayramı ilə əlaqədar olaraq müxtəlif məhsul və xidmətlərə tələbin artdığı bir dövrdür. Dekabr isə Yeni il bayramı ilə bağlı olaraq korporativ tədbirlər, hədiyyələr və müxtəlif kampaniyalarla zəngindir. Bu, bizneslərə müştəri cəlb etmək və satışları artırmaq üçün əlverişli imkanlar yaradır.

Digər tərəfdən, avqust və yanvar ayları bir çox sahələr üçün nisbətən zəif dövrlər hesab olunur. Avqustda insanlar adətən tətil rejimində olur, bu da bəzi sektorlarda tələbatın azalmasına səbəb ola bilər. Yanvar ayı isə bayram sonrası dövr olduğu üçün istehlakçılar arasında qənaət rejimi müşahidə olunur”.

“Bununla yanaşı, hər biznesin özünəməxsus xüsusiyyətləri var və hansı ayların daha gəlirli olduğunu müəyyən etmək üçün əvvəlki illərin satış məlumatlarını təhlil etmək, müştəri davranışlarını izləmək və bazar tendensiyalarını araşdırmaq lazımdır. Gələcək planlaşdırmada bu analizlər əsaslı qərarlar qəbul etməyə kömək edə bilər. Bütün bunları nəzərə alaraq, biznes sahibləri fəaliyyət sahələrinə uyğun strategiyalar qurmalı, mövsümi tələbləri və bazarın ehtiyaclarını əvvəlcədən müəyyən edərək, satışlarını optimallaşdıra bilərlər” - deyə, R.Məmmədova əlavə edib.

Əvəz Həsənov