Yerli onlayn ticarət saytları niyə populyar deyil?

Son dövrlər sosial şəbəkələrdə yerli onlayn alış-veriş saytlarının reklamlarına tez-tez rast gəlinir. Həmin saytlara daxil olarkən isə, orda satış üçün təklif edilən məhsulların qiymətlərinin uyöun olduğu görünür. Lakin ölkəmizdə yerli onlayn alış-veriş saytlarından çox xarici onlayn saytlar populyardı.

Bunun səbəbi nədir? Bu insanların inamsızlığı, yoxsa, marketinq siyasətinin zəifliyi ilə bağlıdır? 

Mövzu ilə bağlı Valyuta.az-a danışan iqtisadçı Xalid Kərimli bildirib ki, bunun səbəbi ölkədə qeyri-neft sektorunun inkişaf etməməsidir:

“Özəl sektor zəif inkişaf edir. Məsələn, biz kənd təsərrüfatında pambığı xammal şəklində satırıq. Özümüz paltar istehsal etmirik. Ona görə də özümüz satacağımız hansısa bir məhsulumuz yoxdur. Belə olanda, nəyi sataq, nəyi reklam edək”. 

İqitsadçı əlavə edib ki, onlayn saytların yaradılması böyük investisiya tələb edir: “Həmin saytlar isanlara çatmaq üçün reklama böyük pullar xərcləyir. Bu saytların da az olması insanların inamsızlığı ilə deyil, iqtisadiyyatımızın zəif olması ilə bağlıdır. Onlar ölkədə istehsal edilən hansısa bir məhsulu satmalıdır ki, onların da marjaları olsun, bununla da öz işçi, reklam xərclərini qarşılaya bilsinlər”. 

Ölkəmizdə beynalxalq onlayn satış saytlarının daha çox populyar olma səbəbləri haqqında danışan Xalid Kərimli bildirib ki, belə satış saytları daha çox öz ölkələrində istehsal edilən məhsulları satırlar, yaxud da sənayesi güclü olan, ixracatçı ölkələrə məxsusdur: “Xaricə ixrac etdiyimiz məhsullar daha çox əmtəə hesab olunur. Biz neft, qızıl, elektrik enerjisi satırıq”. 

Günay