Üç dostun uğursuzluqdan multimilyonluq biznesə gedən yolu - SƏHƏR OXUSU

Milyonçuların çoxu milyon dəfə uğursuzluqla üzləşir, hər şeyini itirirlər. Cənub-Şərqi Asiyanın ən böyük çatdırılma şirkətlərindən birinə çevrilən Ninja Vanın yaranma hekayəsi də əslində uğursuzluqdan başlayıb.

32 yaşlı Çanq Ven Lay (Chang Wen Lai) bank sektorundakı karyerasından imtina etdikdən sonra dostları Boxian Tan və Shaun Chong ilə birlikdə əvvəlcə onlayn kişi geyim brendi yaratmağa çalışıb. Lakin satış etdikcə bir problem üzə çıxıb: sifarişləri çatdırmaq çox çətin idi. Bəs necə olur ki, onlar nəhəngə çevrilir?

Valyuta.az Ninja Vanın uğur hekayəsini təqdim edir:

Lay deyir ki, həmin dövrdə logistika sektoru e-ticarətin sürətli artımına uyğunlaşmamışdı və sifarişlərin vaxtında çatdırılması böyük ağrı nöqtəsi idi. Məhz bu problem onları yeni biznes ideyasına yönəldib.

“Bir az sadəlövh şəkildə dedim ki, gəlin öz logistika şirkətimizi quraq, çətin olmaz",- Lay bildirir. Beləcə, üç dost cəmi bir ədəd ikinci əl mikroavtobus alaraq 2014-cü ildə Ninja Vanı təsis edib.

Beş ildə regional nəhəngə çevrilmə

Başlanğıcda həm geyim markasını, həm də çatdırılma xidmətini paralel idarə edən komanda bir ildən sonra qərara gəlib ki, yalnız logistika istiqamətinə fokuslansın. Bu qərar qısa müddətdə özünü doğruldub.

2015–2016-cı illərdə Ninja Van ardıcıl olaraq Sinqapur, Malayziya, İndoneziya, Vyetnam, Filippin və Tailand bazarlarına daxil olaraq regionda sürətlə yayılıb.

Şirkət bu gün Cənub-Şərqi Asiyanın altı ölkəsində tam əhatə təmin edir və yaxın vaxtlarda Bruney bazarına da daxil olmağı planlaşdırır.

Əsas üstünlüklərindən biri onların texnologiyaya əsaslanan çatdırılma modelidir: real vaxt izləmə, marşrut optimizasiyası və avtomatlaşdırılmış idarəetmə sistemləri.

20 min nəfərlik komanda və davamlı böyümə

Ninja Van rəqiblərindən fərqli olaraq sürücülərini birbaşa işə götürür. Lay hesab edir ki, şirkətin gündə milyonlarla bağlamanı daşıması üçün sabit və təcrübəli komanda vacibdir.

Artan rəqabətə baxmayaraq, şirkət özünü regionun ən sürətli böyüyən logistika oyunçularından biri kimi möhkəmləndirib.

İnvestisiya rekordu və gələcək hədəflər

2018-ci ildə Ninja Van tarixinin ən böyük investisiyalarından birini alıb - 87 milyon dollarlıq C seriyası. Ümumi investisiya məbləği 300 milyon dollara çatıb və şirkət regional “unikorn” statusuna yaxınlaşır.

CEO Lay bildirir ki, məqsədləri qeyri-real sürətlə böyümək deyil:

“Biz sürətli yox, məsuliyyətli şəkildə böyüyürük. İnsanlara, müştəri məmnuniyyətinə və xidmət keyfiyyətinə fokuslanırıq. Bunlar olarsa, mənfəət də gələcək".