Şəhər mərkəzində kirayədə qalmaq, yoxsa şəhərdən kənarda ev almaq?

Bu gün bir çox insan ev almağı xəyal edir, amma kirayədə yaşayır. Bəziləri isə bilərəkdən kirayəni seçir. Kimi deyir azadlıq kirayədədir, kimi isə güvəni yalnız öz evində tapır. Amma məsələ təkcə seçim deyil, söhbət puldan, riskdən və gələcəkdən gedir.

Bəs ev sahibi olmaq, yoxsa kirayə qalmaq sərfəlidir?

Əmlak üzrə ekspert Elnur Fərzəliyev Valyuta.az-a bildirir ki, Avropa, Türkiyə və digər inkişaf etmiş ölkələrin daşınmaz əmlak sektoruna nəzər saldıqda görürük ki, əhalinin böyük bir qismi kirayə mənzillərdə yaşayır:

“Bu tendensiyanın əsas səbəbi vətəndaşların qazandıqları əməkhaqqının işlədikləri əraziyə daha yaxın yerlərdə kirayə ev tutmağa bəs etməsidir. Digər səbəb isə, ölkədə iqtisadi şəraitin yaratdığı nəticələrdir. Kənd və rayonlarda işsizlik səviyyəsinin yüksək olması insanları böyük şəhərlərə köçməyə məcbur edir. Azərbaycanda vəziyyətə təsir edən mühüm amillərdən biri də 1-ci Qarabağ müharibəsi ilə əlaqədar yüz minlərlə insanın məcburi köçkün düşərək böyük şəhərlərə, xüsusilə Bakıya axın etməsi olub. Bu proses nəticəsində paytaxtda daşınmaz əmlaka tələbat kəskin artıb. Bu səbəbdən də ölkənin digər bölgələri ilə müqayisədə Bakıda qiymətlər yüksəlib, bölgələrdə isə daşınmaz əmlaka maraq azalıb”.

“İnsanların böyük bir hissəsi həm yaşamaq, həm də gəlir əldə etmək (yəni kirayə vermək) məqsədilə əsasən böyük şəhərlərdə əmlak almağa üstünlük verir. Bakı şəhərinə yaxın ərazilərdə — xüsusilə Xırdalan, Sumqayıt, Masazır və digər Bakıətrafı yaşayış məntəqələrində yaşayan vətəndaşların iş və təhsil yerlərinin paytaxtın mərkəzində yerləşməsi səbəbindən onlar çox vaxt öz evlərində yaşamır, şəhərin mərkəzində kirayə ev tuturlar. Bunun əsas səbəblərindən biri paytaxtı ətraf ərazilərlə birləşdirən yolların yüksək tıxac yüküdür. Tıxaclar həm vaxt itkisinə, həm də yol xərclərinin artmasına gətirib çıxarır. Nəticədə insanlar metro stansiyalarına yaxın ərazilərdə kirayə qalmağa üstünlük verirlər”- deyə ekspert qeyd edir.

E.Fərzəliyev bildirir ki, əlbəttə, hər bir vətəndaşın əmlak sahibi olmaq arzusu var:

“Lakin hazırda mənzil qiymətləri yüksək olduğundan bir çoxları hələlik bu arzunu reallaşdıra bilmir. Eyni zamanda kirayə qiymətləri də davamlı olaraq artır. Hazırda paytaxtın mərkəzi ərazilərində ən ucuz 1 otaqlı köhnə tikili mənzilin kirayəsi təxminən 400 manat təşkil edir. Otaq sayı artdıqca qiymətlər də yüksəlir. Yeni tikililərdə isə kirayə qiymətləri daha da bahadır. Bu səbəbdən mərkəzdə yaşamaq xüsusilə az təminatlı ailələr üçün çətinləşir. Buna görə bəzi insanlar kirayədə qalmaq əvəzinə yığıb uzunmüddətli perspektivdə əmlak almağa üstünlük verə bilərlər”.

Tənzilə Ağabalayeva