"Duolingo" əməkdaşlarına Yeni ildə 2 həftəlik ödənişli məzuniyyət verdi

Dünyaca məşhur dilöyrənmə platforması "Duolingo" bu qış da ənənəsini qoruyaraq, bütün əməkdaşlarına eyni vaxtda 2 həftəlik ödənişli tətil təqdim edib.

Valyuta.az xəbər verir ki, şirkətin həmtəsisçisi və CEO-su Luis von Ahn bildirib ki, kollektiv şəkildə tətil vermək fərdi məzuniyyətlərə nisbətən daha çox effektivlik və real istirahət təmin edir.

Hazırda təxminən 950 əməkdaşı olan və ilin ərzində işçi sayını 14% artıran şirkət, bu il də qərarını dəyişməyib. CEO-nun sözlərinə görə, bir çox korporasiyalar büdcələri daraldıb, işdən çıxarmalar edib, iş qaydalarını sərtləşdirib, lakin "Duolingo" bunun əksini seçərək “insana sərmayə” prinsipini qoruyub.

Niyə hər kəs eyni vaxtda tətilə çıxır?

Von Ahn qeyd edir ki, şəxsi məzuniyyətlər zamanı insan işdən qopmur - mesajlar yığılır, e-maillər cavabsız qalır və qayıdışda “geridə qalma” stressi yaranır. "Duolingo" isə tətili kollektivi ilə birlikdə edir, yəni iş prosesi dayanır və əməkdaşlar tamamən “kənarlaşa” bilir. Yalnız tətbiqin 24/7 fəaliyyətini təmin edən kiçik bir növbə heyəti aktiv qalır.

“İşə qayıdanda heç bir şeyə çatmaq məcburiyyəti olmur. Həqiqi istirahət üçün bu, həlledicidir”, - deyə  CEO bildirib.

2 həftəlik fasilə beynəlxalq komanda üçün vacibdir

Şirkətin əməkdaşları müxtəlif ölkələrdə yaşayır və bir çoxu ailəsinə qayıtmaq üçün uzun məsafələr -10 saatlıq uçuşlar edir. Von Ahn deyir ki, iki günlük həftəsonu belə səyahətlər üçün heç nəyi həll etmir. İki həftəlik fasilə isə real ailə vaxtı və şəxsi həyat üçün imkan yaradır.

CEO əlavə edir ki, uzun fasilə işçilərə təkcə dincəlmək yox, həm də düşünmək - şəxsi planları, həyat ritmini, karyera məqsədlərini yenidən dəyərləndirmək üçün imkan verir.

Xərc kimi görünən investisiya

"Duolingo" əməkdaşlara tətil zamanı da əməkhaqqı ödəyir, amma CEO-nun fikrincə, bu “xərc” deyil, şirkətin dayanıqlı qurulması üçün investisiyadır.

“Uzunömürlü şirkət yaratmaq üçün əsas olan şeyləri – insanı qorumaq lazımdır", - von Ahn qeyd edib.

Sərvanə Rəmixanova