Niyə Mark Kyuban sərvətinin böyük hissəsini nağd saxlayır?

Şəxsi maliyyə mövzusunda məşhur bloqları, videoları və podkastları izləyənlər tez-tez oxşar tövsiyə ilə qarşılaşırlar: gəlirin müəyyən hissəsi investisiyaya yönəldilməlidir. Bu, ümumilikdə düzgün maliyyə strategiyası hesab olunur. Lakin bəzi ekspertlər — o cümlədən sahibkar və investor Mark Kyuban (Mark Cuban) — portfelin böyük hissəsinin nağd vəsaitdə saxlanmasını daha məqsədəuyğun sayırlar.

Kyuban-ın bu yanaşmanı seçməsinin bir neçə əsas səbəbi var.

Maliyyə imkanlarını dərhal dəyərləndirmək imkanı

Dünyanın ən uğurlu investorlarından biri hesab edilən Uorren Baffet (Warren Buffett) uzun illərdir “səbr və uzunmüddətli saxlama” prinsipini təbliğ edir. Lakin diqqətçəkən məqam ondan ibarətdir ki, Baffet yalnız investisiya ilə kifayətlənmir — o, eyni zamanda böyük həcmdə nağd vəsait saxlayır.

2024-cü ilin sonunda Berkşir Heteuey (Berkshire Hathaway) şirkətinin nağd ehtiyatları 325 milyard dollara yüksəlib ki, bu da 2023-cü ilin sonu ilə müqayisədə təxminən iki dəfə çoxdur.

Nağd kapitalın əsas üstünlüyü ondan ibarətdir ki, hər hansı aktiv — səhm, daşınmaz əmlak və ya nadir əşya — ucuzlaşdığı anda dərhal alım qərarı vermək mümkündür. Digər investorlar və şirkətlər likvidlik çatışmazlığı səbəbindən gözləməli olduqları halda, Baffet imkan yaranan kimi addım ataraq potensial qazancı maksimum dərəcədə artırır.

Bazarın kəskin dəyişkənliyindən qorunmaq

İnvestisiya sahəsində tez-tez səslənən qaydalardan biri “aşağı qiymətə al, yüksək qiymətə sat” prinsipidir. Lakin bazarın dəyişkənliyi hər zaman sərfəli nəticə vermir.

Mark Kyuban portfelinin böyük hissəsini nağd vəsaitdə saxlamasını siyasi qeyri-müəyyənlik, qlobal hadisələr və yeni texnoloji dəyişikliklərin bazarda kəskin itkilərə səbəb ola bilməsi ilə izah edir. Onun əsas prinsipi sadədir: “Mən itirmək istəmirəm və böyük riskləri sevmirəm”.

Gözlənilməz hallar üçün maliyyə yastığı

Nağd vəsait saxlamağın səbəbləri yalnız investisiya imkanları ilə məhdudlaşmır. Mütəxəssislər şəxsi maliyyə təhlükəsizliyi üçün təcili yardım fondunun yaradılmasını zəruri hesab edirlər. Maliyyə eksperti Reyçel Kruz (Rachel Cruze) tövsiyə edir ki, ən azı 3–6 aylıq xərcləri ödəyəcək məbləğ nağd şəkildə saxlanılsın.

Bu cür ehtiyat fondu işdən çıxarılma, gözlənilməz tibbi xərclər, avtomobilin xarab olması və ailə büdcəsinə ciddi təsir göstərən digər fövqəladə hallarda mühüm rol oynayır.

Tənzilə Ağabalayeva